एजेन्सी – कप्तान मार्टिन ओडेगार्डको दुई गोल सहयोगमा लन्डन क्लब आर्सनलले इंग्लिस प्रिमियर लिगमा लगातार तेस्रो जित निकालेको छ ।

आर्सनलले घरेलु टोली बर्नमाउथमाथि ३–० को सहज जित हात पारेको हो । एक गोल विलियम सालिवाको नाममा रह्यो ।भिटालिटी स्टेडियम डोरसेटमा शनिबार राति भएको खेलको पाँचौ मिनेटमा कप्तान ओडेगार्डको गोलबाट आर्सनलले सुरुवाती अग्रता लिन सफल भयो ।

गाब्रियल जेससले तीन डिफेन्डरलाई बिट गर्दै दिएको पासमा गाब्रियल मार्टिनेलीको प्रहार गोलरक्षक मार्क ट्राभर्सले बचाएपनि रिवाउन्डमा ओडेगार्डले गोल गर्न सफल भएका हुन् ।

११औं मिनेटमा ओडेगार्डले व्यक्तिगत र टोलीका लागि दोस्रो गोल गर्दै अग्रता दोब्बर पारे । बेन ह्वाइटको क्रसलाई जेससले नियन्त्रणमा लिदै प्रहार गर्न लाग्दा ओडेगार्डले गोल गर्न सफल भएका थिए ।

५४औं मिनेटमा विलियम सालिवाले गोल गर्दै आर्सनलाई ३–० ले अघि बढाए । उनले ग्रानिट झाँकाको पासमा सुन्दर फिनिस गरेका थिए । ७२औं मिनेटमा जेससले गोल गरेपनि अफसाइड ठहरिदा गोलले मान्यता पाएन । त्यसपछि थप गोल निस्कन नसक्दा आर्सनल विजयी हुन सफल भयो ।

ल्गातार तेस्रो जितसँगै आर्सनल ९ अंक जोडेर शीर्षस्थानमा रहेको छ । पराजित बर्नमाउथ ३ अंक जोडेर १४औं स्थानमा रहेको छ ।
अन्य नतिजा
टोटेनहमविरुद्ध वल्भ्स (१–०), क्रिस्टल प्यालेसविरुद्ध एस्टन भिल्ला (३–१), एभर्टनविरुद्ध नटिङहम फरेस्ट (१–१), फुलहमविरुद्ध ब्रेन्टफर्ड (३–२), लेस्टरविरुद्ध साउथह्याम्टन (१–२)