एजेन्सी – इंग्लिस प्रिमियर लिग अन्तर्गत न्युकासल युनाइटेड र म्यानचेस्टर सिटीबीच भएको खेल ३-३ को बराबरीमा सकिएको छ । न्युकासलको घरेलु मैदान सेन्ट जेम्सेस पार्कमा भएको खेलमा दुवै टोलीले अग्रता लिएपनि जित दर्ता गर्न सकेनन् ।

सिटीका लागि इल्काए गुन्डोगन, एर्लिङ हालान्ड र बर्नार्डो सिल्भाले गोल गर्दा न्युकासलका क्यालम विल्सन, मिगुएल आल्मिरोन र काइरन ट्रीपिएरले १-१ गोल गरे । खेलको पाँचौ मिनेटमा नै सिटीले अग्रता लिएको थियो । सिल्भाको पासमा गुन्डोगनले पेनाल्टी क्षेत्रभित्र बललाई सहजै नियन्त्रणमा लिँदै गोल गरे ।

२८ औं मिनेटमा घरेलु टोली खेलमा फर्कियो । एलन सेन्ट म्याक्सिमिनको क्रसमा आल्मिरोनले गोल गरे । सेन्ट म्याक्सिमिनको क्रसलाई उनले अफसाइड ट्रयाप बिट गर्दै ६ यार्ड बक्स भित्रबाट तिघ्राको सहयोगले गोल गरेका थिए । पहिलो हाफको ६ मिनेट समय बाँकी हुँदा न्युकासलले अग्रता लियो । सेन्ट म्याक्सिमिनको पासमा विल्सनले पेनाल्टी क्षेत्र भित्रबाट गोल गर्दै खेल २-१ को स्थितिमा ल्याए ।

दोस्रो हाफको सुरुवातमा न्युकासलले अग्रता दोब्बर पार्यो । ट्रीपिएरले २० यार्ड टाढा प्राप्त फ्रिकिकलाई सिधै गोलमा परिणत गरे । त्यसअघि हालान्डको प्रहार पोस्टमा लाग्दा सिटी बराबरी गर्न चुकेको थियो । तर ४ मिनेटको अन्तरमा दुई गोल गर्दै सिटी खेलमा फर्कियो ।

६० औं मिनेटमा हालान्डले गोल गरे । पेनाल्टी क्षेत्र भित्र बल क्लियर हुन नसक्दा रोड्रीले दिएको बललाई हालान्डले ६ यार्ड बक्स भित्रबाट गोल गरे । ६४ औं मिनेटमा सिल्भाले बराबरी गोल गरे । केभिन डे ब्रुएनको चलाखीपूर्ण पासलाई सिल्भाले नियन्त्रणमा लिँदै सुन्दर फिनिस गरे ।

यस बराबरीसँगै सिटी अंक तालिकाको दोस्रो स्थानमा छ । टोलीले ३ खेलमा ७ अंक जोडेको छ । न्युकासल ३ खेलमा ५ अंकका साथ छैटौं स्थानमा छ । शीर्षस्थानमा रहेको आर्सनलले ३ खेलमा ९ अंक जोडेको छ ।