एजेन्सी – पोलिस फरवार्ड रोवर्ट लेवान्डोस्कीको दुई गोल सहयोगमा क्याटलान क्लब बार्सिलोनाले स्पेनिस ला लिगामा पहिलो जित निकालेको छ ।

बार्सिलोनाले रियल सोसिडाडमाथि उसकै मैदानमा ४–१ को सहज जित निकालेको हो । बार्सिलोनाको जितमा लेवान्डोस्कीले दुई गोल गर्दा औसमाने डेम्वेले र अन्सु फातीले समान एक गोल गरे ।

आइतबार राति भएको खेलको पहिलो मिनेटमा नै लेवान्डोस्कीको गोलबाट बार्सिलोनाले सुरुवाती अग्रता लिन सफल भएको थियो । उनले एलेक्स बाल्डेको पासमा गोल गर्न सफल भए । छैटौं मिनेटमा एलेक्सान्डर इसाकले गोल गर्दै खेललाई १–१ गोलको बराबरीमा ल्याउदा पहिलो हाफ बराबरीमा सकिएको थियो ।

तर, सोसिडाडले बार्सिलोनालाई दोस्रो हाफमा रोक्न सकेन । परिवर्तित खेलाडी अन्सु फाती दोस्रो हाफको तीन गोलमा सम्मिलित भए । ६४औं मिनेटमा फेरान टोरेसको स्थानमा मैदान छिरेका फातीले ६६औं मिनेटमा औसमाने डेम्वेलेको गोलमा असिस्ट दिए ।

६८औं मिनेटमा लेवान्डोस्कीको दोस्रो तथा टोलीको तेस्रो गोलमा फातीले असिस्ट प्रदान गरे । त्यसपछि फातीले ७९औं मिनेटमा गोल गर्दै बार्सिलोनालाई पहिलो जित दिलाए । बार्सिलोना यसअघि पहिलो खेलमा रायो भालेकानोसँग गोलरहित बराबरीमा रोकिएको थियो ।

पहिलो जितसँगै बार्सिलोना दुई खेलबाट ४ अंक जोडेर ४ अंक जोडेर पाँचौ स्थानमा रहेको छ । पहिलो हार बेहोरेको सोसिडाड ३ अंक जोडेर १०औं स्थानमा रहेको छ ।

ला लिगाकै अर्काे खेलमा भिल्लारियलले एट्लेटिको म्याड्रिडलाई २–० ले पराजित गरेको छ । भिल्लारियलको जितमा यारेमी पिनो र जेरार्ड मोरेनो गोल गरे ।

इन्ज्युरी समयको थप गरिएको चौथो मिनेटमा नाहुइल मोलिना सिधै रातो कार्ड खाँदै मैदानबाट बाहिरिएपछि एट्लेटिको १० खेलाडीमा समेटिन पुगेको थियो । त्यसपछि भिल्लारियलले एक गोल थपेको थियो ।

यो जितसँगै भिल्लारियलले रियल म्याड्रिडलाई गोल अन्तरमा पछि पार्दै शीर्षस्थानमा उक्लिएको छ । समान ६ अंक भएपनि भिल्लारियल शीर्षमा रहेको छ । पराजित एट्लेटिको ३ अंक जोडेर आठौं स्थानमा रहेको छ ।

यस्तै अर्काे खेलमा एथलेटिको बिल्वाओले भ्यालेन्सियालाई १–० ले पराजित गरेको छ ।