एजेन्सी – इंग्लिस क्लब म्यानचेस्टर युनाइटेडले क्लबको कीर्तिमानी मुल्यमा ब्राजिली युवा स्टार विंगर एन्टोनीलाई अनुबन्धित गर्न सफल भएको छ ।

युनाइटेडले डच क्लब आयाक्सबाट २२ वर्षीय एन्टोनीलाई ९५ मिलियन युरोमा क्लबमा अनुबन्ध गर्न सफल भएको हो । यससँगै उनी युनाइटेडको सबैभन्दा महँगो तथा प्रिमियर लिगको चौथो महँगो खेलाडी बनेका छन् ।

यसअघि युनाइटेडले फ्रान्सेली मिडफिल्ड पउल पोग्वाका लागि ८९ मिलियन युरो खर्चिएको थियो । त्यसपछि युनाइटेडले डिफेन्डर ह्यारी मगाएरको लागि ८० मिलियन युरो तिरेको थियो ।

यसअघि प्रिमिर लिगमा युनाइटेडले सन् २०१६ मा पोग्वाका लागि ८९ मिलियन युरो खर्चेको थियो । त्यसपछि गत समरमा चेल्सीले रोमेलु लुकाकुका लागि ९७.५ मिलियन पाउन्ड, सन् २०२१ म म्यानचेस्टर सिटीले ज्याक ग्रेलिसलाई १ सय मिलियन पाउन्ड खर्चिएको थियो ।

एन्टोनी यो समरमा युनाइटेडमा अनुबन्ध हुने पाँचौ खेलाडी बनेका छन् । यसअघि युनाइटेडले लिसान्द्रो मार्टिनेज, क्यासमिरो, टाएरेल मलासिया र क्रिस्टियन एरिक्सनलाई अनुबन्ध गरिसकेको छ । यि खेलाडीको लागि युनाइटेडले २१० मिलियन पाउन्ड खर्च गरिसकेको छ । पोग्वा, नेमान्जा माटिच, एडिन्सन काभानी र परेरालगायतका खेलाडीले क्लब छाडिसकेका छन् ।

२२ वर्षीय एन्टोनीले आयाक्सका लागि ८२ खेलमा २४ गोल र २२ असिस्ट दिएका थिए । एन्टोनी २०२० मा ब्राजिली क्लब साओ पाउलोबाट डच च्याम्पियन आयाक्समा अनुबन्धित भएका थिए । म्यानचेस्टर युनाइटेडका हालका प्रशिक्षक एरिक टेन ह्यागको प्रशिक्षणमा उनले आयाक्समा दुई सिजन बिताएका थिए । प्रशिक्षक टेन ह्याग युनाइटेड आएपछि उनले पनि युनाइटेड नै रोजेको बुझिएको छ ।

आयाक्सको लागि आफ्नो ११ च्याम्पियन्स लिग खेलमा ७ गोल गर्दै एन्टोनीले सनसनी मच्चाएका थिए । २०२१ को अक्टोवरमा ब्राजिलको लागि डेब्युर गरेका एन्टोनीले ९ क्याप जित्दै दुई अन्तर्राष्ट्रिय गोल गरिसकेका छन् ।

युनाइटेडले बिहीबार प्रिमियर लिगमा लेस्टर सिटीको सामना गर्दा उनले उक्त खेल खेल्ने सम्भावना रहेको छ । तर कागजी र मेडिकल प्रक्रिया भने पुरा गर्नुपर्ने हुन्छ ।

खेलाडी स्थानान्तरणको समय सकिनै लाग्दा युनाइटेडका पोर्चुगिज भेट्रान फरवार्ड क्रिस्टियानो रोनाल्डो क्लबमा रहने या नरहने अनुमानका बीच युनाइटेडले युवा खेलाडी टोलीमा आबद्ध गरेको हो ।