काठमाडौं (हाम्रो खेलकुद)– दक्षिण एसियामा महिलातर्फको दुई ठूला प्रतियोगिता मध्येको एक साफ च्याम्पियनसिपमा नेपालले सधै सुखद सुरुवात गर्दै आएको छ । यसअघिका पाँचै संस्करणमा नेपालले विजयी सुरुवात गरेको छ ।

दशरथ रंगशालामा मंगलबार छैटौं संस्करणको सुरुवात हुँदा पनि नेपालले जितबाट सुरुवात गर्ने अपेक्षा गरिएको छ । यसअघि नेपालले च्याम्पियनसिपको पहिलो खेलमा जितमात्र होइन कम्तीमा ३–० को जित निकालेको छ ।

सन् २०१० मा बंगलादेशबाट सुरु भएको च्याम्पियनसिप नेपालले लगातार दोस्रो पटक आयोजनको मौका पाएको छ । बंगलादेशमा भएको पहिलो संस्करणको पहिलो खेलमा नेपालले माल्दिभ्सलाई ६–० ले हराएको थियो । २०१२ मा श्रीलंकामा आयोजना भएको च्याम्पियनसिपमा नेपालले पाकिस्तानमाथि ८–० को जित निकालेको थियो ।

सन् २०१४, २०१६ र २०१९ को संस्करणमा पहिलो खेलमा भने नेपालको भेट भुटानसँग हुँदै आएको छ । संयोगवश नेपालले यसपटक पनि भुटानविरुद्ध खेल्दै च्याम्पियनसिपको सुरुवात गर्दैछ । २०१४ र २०१६ दुवै संस्करणमा नेपालले भुटानलाई ८–० ले हराएको थियो । २०१६ को चौथो संस्करणमा सावित्रा भण्डारी सम्बा एक्लैले ६ गोल गरेकी थिइन् । त्यसो त सावित्रालाई भुटानविरुद्धको खेल निकै फापेको छ ।

विराटनगरमा २०१९ मा भएको पाँचौं संस्करणमा भने नेपालले भुटानमाथि ३–० को जित निकालेको थियो । भुटानविरुद्धका चारै खेलमा सावित्राले गोल गरेकी छन् । २०१४ मा पहिलो पटक च्याम्पियनसिप खेल्दा भुटानविरुद्ध १ गोल गरेकी सावित्राले २०१६ मा ६ गोल र पछिल्लो पटक २०१९ मा १ गोल गरेकी थिइन् । चौथो संस्करणबाहेक नेपाल सबै संस्करणको फाइनल पुगेको थियो । हरेक फाइनलमा भारतसँग पराजित नेपालले सन् २०१६ को सेमिफाइनल पनि भारतसँगै गुमाएको थियो ।

साफ च्याम्पियनसिपमा नेपालको पहिलो खेल

वर्ष – प्रतिद्वन्द्वी – नतिजा

२०१० माल्दिभ्स ६–०

२०१२ पाकिस्तान ८–०

२०१४ भुटान ८–०

२०१६ भुटान ८–०

२०१९ भुटान ३–०