एजेन्सी – इंग्लिस क्लब चेल्सीले आफ्ना मुख्य प्रशिक्षक थोमस टुचेललाई बर्खास्त गरेको छ । लगातारको खराव प्रदर्शनसँगै क्लबले उनलाई बुधबार बर्खास्त गरेको हो ।

चेल्सी मंगलबार राति च्याम्पियन्स लिगको नयाँ सिजनको समूह चरणको पहिलो खेलमै क्रोएसियन क्लब डिनामो जाग्रिवसँग उसकै मैदानमा १–० ले पराजित भएको थियो । टुचेलको प्रशिक्षणमा चेल्सीले यो सिजन राम्रो प्रदर्शन गर्न सकेको छैन ।

चेल्सीले यो सिजन प्रिमियर लिगमा ६ खेलबाट १० अंक जोडेर छैटौं स्थानमा रहेको छ । चेल्सीले प्रिमियर लिगमा यो सिजन लिड्स युनाइटेडसँग ३–० ले तथा साउथह्याम्टनसँग २–१ ले पराजित भएको थियो ।

जर्मनीका ४९ वर्षीय प्रशिक्षक टुचेल २६ जनवरी २०२१ मा फ्रान्सेली क्लब पेरिस सेन्ट जर्मेन (पिएसजी) बाट चेल्सीको मुख्य प्रशिक्षक बनेका थिए । त्यही सिजन उनले चेल्सीलाई च्याम्पियन्स लिगको उपाधि जिताएका थिए । तर, त्यसपछि भने चेल्सीले टुचेलको प्रशिक्षणमा चेल्सीले पछिल्लो समय राम्रो प्रदर्शन गर्न नसकेपछि चेल्सी आफ्ना प्रशिक्षकलाई बर्खास्ती गर्न पुगेको हो ।

टुचेलको प्रशिक्षणमा चेल्सीलाई यो अवधिमा १ सय खेल खेल्दा ६० जित, २४ बराबरी र १६ हारको नतिजा निकालेको छ । टुचेलले यसअघि एफसी अग्सवर्ग, माइन्ज, बोरुसिया डर्टमुन्डसँगै पिएसजीको प्रशिक्षण सम्हालिसकेका छन् ।

घरेलु मैदानमा टोटेनहम हटस्परसँग २–२ गोलको बराबरीमा रोकिएको खेलपछि टोटेनहमका प्रशिक्षक एन्टोनियो कोन्टेसँगको अभद्र व्यवहार गरेपछि उनले एक खेलको प्रतिबन्ध पनि खेपेको थियो ।