काठमाडौं (हाम्रो खेलकुद) – बहराइनमा आयोजना हुने एएफसी यू२० एसियन कप छनोट खेल्ने नेपाली युवा राष्ट्रिय फुटबल टोलीलाई बिदाई गरिएको छ ।

अखिल नेपाल फुटबल संघ (एन्फा) ले बुधबार एन्फा कम्प्लेक्समा यू–२० टोलीको बिदाई गरेको हो । नेपाली टोली बिहीबार बहराइन प्रस्थान गर्ने तालिका छ । नेपाली युवा टोलीलाई नेपाली कांग्रेसका नेता मोहन बस्नेत, एन्फाका अध्यक्ष पंकज नेम्वाङ लगायत एन्फा पदाधिकारीले सफलताको शुभकामनासहित बिदाई गरे ।

मुख्य प्रशिक्षक मेघराज केसीले यसपटक अघिल्लो महिना साफ यू२० च्याम्पियनसिप खेल्ने टोलीको गोलरक्षकमा कुनै परिवर्तन गरेको छैन ।

डिफेन्समा स्यान्सु भुषाल, जान ताम्ली, राज थोकर टोलीमा पर्दा आयुष श्रेष्ठ, रोशन थापा र सोनित दाहाल बाहिरिएका छन् । मिडफिल्डमा मोहित गुरुङ बाहिरिदा राकेश विश्वकर्माले टोलीले स्थान बनाएका छन् । फरवार्डमा दिपेश राई बाहिरिएका छन् ।

यू२० एसियन कप छनोटमा नेपाल समूह ‘बी’ मा रहेको छ । नेपालको समूहमा कतार, बहराइन, भुटान र बंगालादेश छन् । समूह चरणको खेल सेप्टेम्बर १० देखि १८ सम्म हुनेछ । नेपालले भुटानसँग सेप्टेम्बर १० मा खेल्दा १२ सेप्टेम्बरमा कतारसँग खेल्नेछ ।

आयोजक बहराइनसँग सेप्टेम्बर १४ र बंगलादेशसँग सेप्टेम्बर १८ मा खेल्नेछ । समूह विजेताले २०२३ मा उज्वेकिस्तानमा आयोजना हुने यू–२० एसियन कपमा स्थान बनाउने छन् ।

नेपाली टोली
गोलरक्षक – ईश्वर गुरुङ, टोप बहादुर राना र जियारथ शेख
डिफेन्डर – स्यान्सु भुषाल, जान ताम्ली, राज थोकर, अमर श्रेष्ठ, अजय चौधरी, सुमित श्रेष्ठ, श्रृजन दानी, अभिषेक वाइबा
मिडफिल्डर – राकेश विश्वकर्मा, सञ्जिव लामा, दिपेश गुरुङ, आशिष राई, सन्दिप कार्की, जन्मजय धामी, कृतिश रत्न छुन्जु, मनग्य नकर्मी, आयुष घलान
फरवार्ड – निरन्जन मल्ल, रोहन खड्गी, सुगम सुवाल
मुख्य प्रशिक्षक – मेघराज केसी, गोलकिपिङ प्रशिक्षक – उज्जल मानन्धर, सहायक प्रशिक्षक – बाल गोपाल साहुखल, हेड अफ डेलिगेसन – पुरुषोत्तम थापा, टिम अफिसियल – भगवान बहादुर दर्लामी मगर, मिडिया अफिसर उमेश दाहाल, फिजियो – लोकेन्द्र कुँवर र टिम म्यानेजर – दिवाकर घले गुरुङ