एजेन्सी – अर्जेन्टिनी फरवार्ड गोन्जालो हिगुआइनले यस सिजनको अन्त्यसँगै व्यवसायिक खेल जीवनबाट सन्यास लिने घोषणा गरेका छन् ।

अमेरिकी मेजर लिग सकर (एमएलएस) क्लब इन्टर मियामीका लागि खेलिरहेका फरवार्ड हिगुआइनले सोमबार व्यवसायिक खेल जीवनबाट सन्यास घोषणा गरेको क्लबले जनाएको छ ।

३४ वर्षीय हिगुआइन सन् २०२० मा इटालियन क्लब युभेन्ट्सबाट मियामी पुगेका थिए । त्यसअघि उनी सन् २०१६ मा इटालियन क्लब नेपोलीबाट युभेन्ट्स पुगेका थिए । उनले युभेन्ट्सका लागि १ सय ४९ खेलमा ६६ गोल गरेका थिए ।

स्पेनिस क्लब रियल म्याड्रिडका पूर्व खेलाडीसमेत रहेका हिगुआइनले युभेन्ट्सबाट तीन सिरी ‘ए’ र दुई पटक कोपा इटालिया जितेका थिए ।

इटालियन क्लब एसी मिलान र इंग्लिस क्लब चेल्सीका लागि लोनमासमेत खेलेका हिगुआइनले रियलबाट सात सिजन खेल्दा ३ ला लिगा, दुई स्पेनिस सुपर कोपा र एक कोपा डेल रे उपाधि जितेका थिए ।

यस्तै नेपोलीबाट कोपा इटालिया र सुपर कोपा इटालिया र चेल्सीबाट युरोपा लिग जितेका छन् । अर्जेन्टिनी क्लब लिभर प्लेटबाट व्यवसायिक खेल करिअर सुरु गरेका हिगुआइनले क्लब फुटबलमा ७०८ खेल खेल्दा ३३३ गोल र १ सय बढी असिस्ट दिएका छन् ।

अर्जेन्टिनाको राष्ट्रिय टोलीबाट २०१८ मै सन्यास लिएका हिगुआइनले ७५ क्याप जित्दा ३१ अन्तर्राष्ट्रिय गोल गरेका छन् ।