पोखरा (हाम्रो खेलकुद) – नवौं राष्ट्रिय खेलकुद अन्तर्गत पुरुष फुटबलतर्फ प्रदेश १ समूह चरणमै बाहिरिने सम्भावना बढेको छ ।

पोखरा रंगशालामा शनिबार गण्डकीले प्रदेश १ विरुद्ध पहिलो हाफमा लिएको २-० को अग्रता जोगाउँदै सेमिफाइनल पुग्ने सम्भावना बलियो बनायो । गण्डकीको जितमा कमल थापा र जय गुरुङले १-१ गोल गरे । तेस्रो मिनेटमै जयले गण्डकीलाई १–० को अग्रता दिलाए । २७ औं मिनेटमा कमलको शक्तिशाली प्रहारलाई प्रदेश १ का गोलरक्षक किशोर गिरीले बचाउन सकेनन् ।

समूह ए तर्फ यसअघि पहिलो खेलमा गैर आवासीय नेपाली संघ (एनआरएनए) ले प्रदेश १ लाई २-० ले पराजित गरेको थियो । तर प्रदेश १ ले प्रोटेस्ट हालेपछि आयोजकले एनआरएनएका ८ खेलाडीलाई अयोग्य सावित गर्दै नतिजा प्रदेश १ लाई सुम्पियो । आजको खेलमा जित हासिल गरेको भए प्रदेश १ सेमिफाइनलमा प्रवेश गर्ने थियो ।

अब गण्डकी र एनआरएनएको खेलको नतिजाले समूहबाट सेमिफाइनलमा पुग्ने टोलीको छिनोफानो हुनेछ । ८ खेलाडी प्रोटेस्ट लागेपछि एनआरएनएले आज पत्रकार सम्मेलन गर्दै असन्तुष्टि पनि व्यक्त गरेको थियो । अब एनआरएनएले अन्तिम खेलमा गण्डकीसँग खेल्ने सम्भावना न्यून छ । खेलाडी अपुग हुने देखिएको र अन्य खेलाडीमाथि पनि प्रोटेस्ट लाग्ने अवस्था रहेकाले एनआरएनए अनुपस्थित हुने सम्भावना रहेको छ ।

यो पनि पढ्नुहोस :

८ खेलाडीविरुद्धको प्रोटेष्ट सदर, बाँकी खेल खेल्न नपाउने

फुटबलरका पीडा – प्रदेशले टोलीमा राखेन, एनआरएनएबाट खेल्न नियमले मिल्दैन