एजेन्सी – फिफा विश्वकप कतार २०२२ को पूर्वसन्ध्यामा सामाजिक संजालभर एक तस्वीरले खुब चर्चा पायो । क्रिस्टियानो रोनाल्डो र लियोनेल मेस्सीले विश्व प्रसिद्ध लुइ भुटोंका लागि खिचेको तस्वीरले फुटबल प्रेमीमाझ स्थान पायो ।

प्रसिद्ध फोटोग्राफर एनी लेबोभिट्जले खिचेको यो तस्वीर रोनाल्डो र मेस्सी एकसाथ खिचिएको भने होइन । दुई फरक फोटोसुट गरेर एक बनाइएको तस्वीरमा रोनाल्डो र मेस्सी चेस खेलिरहेका देखिन्छन् । लुइ भुटोंले विश्वकपकै पूर्वसन्ध्यामा तस्वीर सार्वजनिक गर्नुले यसको विशेष सन्देश रहेको आँकलन गर्न सकिन्छ ।

रोनाल्डो र मेस्सीले चेस खेलिरहेको तस्वीरमा चेस बोर्ड प्रयोग गरिएको छैन । यी दुईले ब्रिफकेसमा चेस खेलिरहेका छन् । र यस्तै ब्रिफकेस सन् २०१८ मा विश्वकप ट्रफी सार्वजनिक गर्न प्रयोग गरिएको थियो ।

सांकेतिक रुपमा रोनाल्डो र मेस्सीले लुइ भुटोको ब्रिफेसमाथि चेस खेलेको तस्वीर विश्वकप उपाधिका लागि दुईको भिडन्त हुनसक्ने पक्षलाई लिएर पनि हेर्न सकिन्छ । यदि पोर्चुगल र अर्जेन्टिना समूह विजेता बन्दै अघि बढेको अवस्थामा यी दुई फाइनलमा आमने सामने हुन सक्छन् ।

अर्जेन्टिना विश्वकपको समूह सी मा साउदी अरब, मेक्सिको र पोल्यान्डसँग रहेको छ । यता पोर्चुगल ग्रुप अफ डेथ मानिएको उरुग्वे, दक्षिण कोरिया र घानासँग समूह एच मा छ ।