एजेन्सी – हाकिम जिएचका लागि पछिल्लो केहि वर्ष सहज रहेको छैन । आयाक्सबाट चेल्सी आएका उनले राष्ट्रिय टोलीबाट पनि सन्न्यास लिने अवस्था थियो । तत्कालिन प्रशिक्षकसँग राम्रो सम्बन्ध नरहेपछि उनले राष्ट्रिय टोलीबाट बिदा लिएका थिए ।

सन् २०१९ को अफ्रिका कप अफ नेसन्स (एफ्कन) मा मोरक्को राउन्ड अफ १६ मा बाहिरियो । निकै कमजोर मानिएको बेनिनविरुद्ध टोली हार बेहोर्न पुगेको थियो । जिएचले अतिरिक्त समयमा पेनाल्टीमा गोल गर्न नसक्दा मोरक्को बाहिरिन पुगेको थियो ।

सन् २०२१ को एफ्कनअघि प्रशिक्षक वाहिद हालिलोजिचले सार्वजनिक रुपमा नै आलोचना गर्दै जिएचलाई टोलीबाट बाहिर राखे । प्रशिक्षकका अनुसार जिएचले मिहिनेत गर्न नमानेको आरोप थियो । जिएचले उक्त कदमको विरोध गर्दै अन्तर्राष्ट्रिय फुटबलबाट सन्न्यास घोषणा गरे ।

तर अगस्ट २०२२ मा प्रशिक्षक हालिलोजिच बर्खास्तमा परे । मोरक्कोको घरेलु लिग र अफ्रिकन च्याम्पियन्स लिगमा वाइदाद एथ्लेटिक क्लबलाई उपाधि दिलाएका वालिद रेग्रागुइ प्रशिक्षकमा नियुक्त भए । रेग्रागुइले आफू नियुक्त हुनेबितिक्कै आफ्नो योजनामा रहेका सबै खेलाडीलाई सम्पर्क गरे । जिएचलाई व्यक्तिगत भेट गर्दै उनले सन्न्यास फिर्ता लिन आग्रह गरे ।

रेग्रागुइले आफ्नो टोलीमा रहेका सबै खेलाडीलाई विश्वकपमा तीन खेल मात्र होइन, लामो यात्राका लागि तयार रहन भनेका थिए । जिएचको हकमा पनि यस्तै गरेको उनले बताए । ‘जिएचको अघिल्ला प्रशिक्षकसँग सम्बन्ध राम्रो थिएन । तर खेलाडीको रुपमा उनी उत्कृष्ट क्षमताका खेलाडी हुन् । उनी युरोपमा निरन्तर राम्रो खेलिरहेका थिए । त्यसैले उनलाई टोलीमा समावेश गर्न मैले धेरै सोच्नुपर्ने थिएन । उनलाई मानसिक रुपमा तयार पार्नु मेरो जिम्मेवारी थियो,’ रेग्रागुइले भनेका थिए ।

फलस्वरूप जिएचले मोरक्कोको सेमिफाइनल यात्रासम्म आइपुग्दा महत्त्वपूर्ण भूमिका निर्वाह गरेका छन् । विशेषगरी बेल्जियमविरुद्ध जितमा उनले टोलीको आक्रमणमा बलियो प्रदर्शन गरेका थिए । मोरक्को फाइनल पुग्ने लक्ष्यमा रहंदा आक्रमणमा जिएच नै मुख्य पात्र हुनेछन् ।