एजेन्सी – पोर्चुगलको राष्ट्रिय फुटबल टोलीको प्रशिक्षक बन्ने चर्चाका बीच प्रशिक्षक जोसे मोउरिन्हो पोर्चुगल पुगेका छन् ।

पोर्चुगलले फर्नान्डो सान्तोसलाई बर्खास्त गरेसँगै राष्ट्रिय टोलीको प्रशिक्षक पद रिक्त रहेको छ । पोर्चुगल फुटबल महासंघले मोउरिन्होलाई मुख्य दावेदारको रुपमा पनि हेरेको छ । हाल इटालियन क्लब एएस रोमामा व्यस्त रहेका मोउरिन्होले भने यसबारे केही बोलेका छैनन् । पोर्चुगलले उनलाई एकै समय रोमा र राष्ट्रिय टोलीमा काम गर्न दिने समेत विकल्प खुला राखेको चर्चा छ ।

मोउरिन्हो र रोमा पनि मध्य सिजन क्याम्पका लागि विहीबार पोर्चुगल पुगेका छन् ‌। विमानस्थलमा मोउरिन्होलाई पोर्चुगलको रिक्त पदम उनको सम्भावना बारे प्रश्न सोधिएको थियो । तर मोउरिन्हो कुनै जवाफ नदिइ अघि बढेका थिए ‌‌। रोमाले पनि यसबारे कुनै प्रतिक्रिया दिएको छैन ।

पोर्चुगल फुटबल महासंघले भने सन् २०२४ को युरोपेली च्याम्पियनसिपलाई लक्षित गर्दै मोउरिन्हो भित्र्याउन चाहेको बुझिएको छ । यसबारे मोउरिन्होको टिमसँग छलफल गरिएको स्थानिय संचारमाध्यमले जनाएका छन् । यद्यपि मोउरिन्होले आफ्नो यकिन उत्तर दिएका छैनन् ।

रोमाले यस साता पोर्चुगलमा प्रशिक्षण क्याम्प र मैत्रीपूर्ण खेल खेल्ने कार्यक्रम रहेको छ । यसबीचमा मोउरिन्हो र महासंघबीच छलफलले थप स्थान पाउने पक्का छ । मोउरिन्हो पुन: क्रिस्टियानो रोनाल्डोको प्रशिक्षकका रुपमा आउलान् वा अन्य केहि वातावरण सिर्जना होला, त्यो चासोको विषय बनेको छ ।