एजेन्सी – साउदी अरबको शीर्ष डिभिजन लिग रोशन साउदी लिग अन्तर्गत विहीबार हुने भनिएको अल नासर र अल ताएबीचको खेल स्थगित भएको छ ।

भारी वर्षाका कारण रंगशालाको विद्युतमा समस्या आउँदा खेल २४ घण्टा पछि सरेको हो । अल नासर हाल अंक तालिकाको शीर्षस्थानमा रहेको छ । टोलीले ११ खेलमा २६ अंक जोडेको छ । यस्तै अल शबाबले १० खेलमा २५ अंक जोडेको छ । अल नासरको प्रतिद्वन्द्वी अल ताए ११ खेलमा १८ अंकसहित सातौं स्थानमा छ ।

यसै साता क्रिस्टियानो रोनाल्डोलाई अनुबन्ध गरेपनि पोर्चुगिज फरवार्डले डेब्युका लागि अझै २ खेल कुर्नुपर्ने भएको छ । गत महिना नै एभर्टनका समर्थकको हातबाट फोन खोसेको आरोपमा इंग्ल्यान्डको फुटबल एसोसिएनस (एफए) ले रोनाल्डोलाई दुई खेलको प्रतिबन्ध सुनाएको थियो । उक्त प्रतिबन्ध फिफाको नियम अनुसार इंग्ल्यान्ड वा त्यसभन्दा बाहिरको घरेलु लिगमा लागु हुने थियो । युनाइटेडसँग आपसी समझदारीमा सम्झौता तोडेका उनी विश्वकप अवधिभर क्लबविहीन थिए ।

रोनाल्डोमाथि लागेको प्रतिबन्ध घरेलु लिग खेलमा मात्र लागु हुनेछ । यसका कारण रोनाल्डोले साउदी क्लब अल नासरबाट आगामी दुइ खेल गुमाउने पक्का भएको हो । अल नासरले भोली राती ८:४५ बजे अल ताएको सामना गर्दैछ । उक्त खेलका लागि अल नासरले २८ हजार क्षमता भएको घरेलु मैदान एमरसुल पार्कको सबै टिकट विक्री गरिसकेको छ । तर रोनाल्डो खेलमा दर्शकदिर्घामा रहनेछन् ।

रोनाल्डोले अल शबाबविरुद्ध शनिबार हुने डर्बी खेल पनि गुमाउने छन् । तर उक्त खेल पनि पछि सर्ने सम्भावना छ । उनले जनवरी २१ मा एतिफाकविरुद्ध खेल्दै लिग डेब्यु गर्नेछन् । उक्त खेल नेपाली समयअनुसार रातको ८:४५ बजे हुनेछ ।

गत अप्रिलमा गुडिसन पार्कमा हार बेहोरेपछि ड्रेसिङ रुम छिर्दै गर्दा ३७ वर्षीया रोनाल्डोले फोनमा ठक्कर दिएको देखिएको थियो । एफएले उनलाई अनुचित र हिंसात्मक आचरणको लागि दोषी ठहर गर्दै कारवाही गरेको थियो । उनलाई त्यतिबेला (अगस्ट) मै प्रहरीले सतर्क गराएको थियो ।

घटनापछि तुरुन्तै रोनाल्डोले युवा फ्यानसँग माफी मागेका थिए । एफएले रोनाल्डोले अनुचित आचरणको आरोप स्वीकार गरेको तर हिंसात्मक आचरण नभएको बताएको छ । यस्तै एक अन्तर्वार्तामा युनाइटेडका प्रशिक्षक एरिक टेन ह्यागको आलोचना गरेका रोनाल्डोलाई फुटबल संघले ५० हजार पाउण्ड जरिवाना समेत गरेको छ ।

ओल्ड ट्राफर्डमा उनको दोस्रो स्पेलको अन्त्यमा एक विवादास्पद अन्तर्वार्ता पछि उनले युनाइटेडको आलोचना गर्दै प्रशिक्षक टेन ह्यागको लागि आफ्नो ‘कुनै सम्मान’ नरहेको बताएका थिए । त्यसपछि युनाइटेडले रोनाल्डोसँग सम्झौता तोडेको थियो । रोनाल्डोले त्यसपछि साउदी क्लबलाई रोजेका हुन् । उनलाई यसै साता मात्र क्लबमा भव्य स्वागत गरिएको थियो । तर डेब्युका लागि भने रोनाल्डोले दुई खेल कुर्नुपर्ने भएको छ ।