एजेन्सी – बायर्न म्युनिखले बुन्डेसलिगामा विजय यात्रालाई जारी राखेको छ।

हेरी केनले २ गोल गरेको शुक्रवारको खेलमा बायर्नले वेर्डर ब्रेमेनमाथि ४-० को जित निकाल्यो । केन युरोपका शीर्ष ५ लिगमध्ये कुनै क्लबका लागि सबै भन्दा छिटो १ सय गोल पूरा गर्ने खेलाडी बने।

इङ्ल्यान्ड कप्तान केनले पहिलो हाफको अन्त्यमा पेनाल्टीमा गोल गरे । ६५ औँ मिनेटमा नजिकैबाट गोल गर्दै १ सय ४ खेलमा एक सयौं गोल पुर्याए ।

यसअघि १ सय ५ खेलमा यो कीर्तिमान बनाउने क्रिष्टियानो रोनाल्डो (रियल माड्रिड – २०११) र गतवर्ष म्यानचेस्टर सिटीका स्ट्राइकर एर्लिङ हालान्डले बराबरी गरेका थिए।

जोनाथन टाहले २२ औं मिनेटमा बायर्नका लागि पहिलो गोल गरे। पछि ८७ औं मिनेटमा कोनराड लाइमरले टोलीका लागि चौथो गोल गरे।

गत हप्ताको होफेनहाइमविरुद्धको ४-१ को जितमा पनि केनले ह्याट्रिक गर्दै दुई कीर्तिमान तोडेका थिए। उनले ६७ खेलमै ७० बुन्डेसलिगा गोल पुर्‍याए। जुन लिगको इतिहासमै सबैभन्दा छिटो हो।

३२ वर्षीय केनले यसअघि ५० खेलमै ५४ गोल गर्दै बुन्डेसलिगामा सबै भन्दा छिटो ५० गोल पुर्‍याउने खेलाडीको कीर्तिमान बनाएका थिए।

शुक्रवार उनले लगातार १८ पेनाल्टी गोल गर्ने बुन्डेसलिगाको पहिलो खेलाडी बन्ने अर्को कीर्तिमान पनि बनाए।

केन बुन्डेसलिगामा पहिलो दुई सिजनमै उच्च गोलकर्ता बन्ने पहिलो खेलाडी हुन्। साथै पहिलो दुई सिजनमा नै २५ वा बढी गोल गर्ने एकमात्र खेलाडी समेत हुन्।
यो सिजन उनले ८ खेलमा १५ गोल गरिसकेका छन्।

जसमा ५ बुन्डेसलिगा खेलमा २ ह्याट्रिक समेत छ। भिन्सेन्ट कोम्पानीको टिम बायर्न शतप्रतिशत नतिजासहित लिग तालिकाको शीर्षमा छ।

केन च्याम्पियन्स लिगमा सबैभन्दा धेरै गोल गर्ने इंग्ल्याण्ड खेलाडी हुन् (४२ गोल)। उनले बुन्डेसलिगामा खेलेका सबै २० प्रतिद्वन्द्वीविरुद्ध गोल गरेका छन्।
यो कीर्तिमान यसअघि मिरोस्लाभ क्लोजको मात्र छ। जसले आफूले खेलेका सबै २८ टोलीविरुद्ध गोल गरेका थिए।

केन सन् २०२३ मा टोटेनहम हस्परबाट १ सय मिलियन पाउण्डमा बायर्नमा आबद्ध भएका थिए। उनले टोटेनहमका लागि ४ सय ३५ खेलमा २ सय ८० गोल गरेका थिए।