एजेन्सी – एट्लेटिको म्याड्रिडले करिब ७५ वर्षपछि पहिलोपटक शहर प्रतिद्वन्द्वी रियल म्याड्रिडविरुद्ध एकै खेलमा ५ गोल गरेको छ।

एट्लेटिकोले शनिवार ५-२ को जित निकाल्दै रियलको अपराजित यात्रामा पूर्णविराम लगाइदिएको छ।

एट्लेटिकोले म्याड्रिड डर्बीमा कम्तीमा ५ गोल गरेको यो चौथो पटक मात्र हो। यसअघि सन् १९५० नोभेम्बरमा भएको खेलमा एट्लेटिकोले रियललाई ६-३ ले हराएको थियो।

यो सिजन रियलले पहिलो हार बेहोरेको छ। रियलले ला लिगाका सुरुवाती ६ खेल जितेका थियो । च्याम्पियन्स लिगको पहिलो खेलमा मार्सेलाई २-१ ले पराजित गरेको थियो। रियलले लिगमा अन्तिम पटक यति धेरै गोल २०१८ अक्टोबरमा बार्सिलोनासँग ५-१ ले हार्दा खाएको थियो।

खेलमा डिएगो सिमियोनेको टोलीलाई रोबिन नर्मान्डले हेडरमार्फत १४ औं‌ मिनेटमा सुरुवाती अग्रता दिलाए। तर त्यसलाई रियलका किलियन एमबाप्पेले २५ औं मिनेटमा बराबरी र अर्दा गुलरका ३६ औं मिनेटमा गोल गर्दै अग्रता दिलाए।

तर पहिलो हाफको इन्जुरी समयमा एलेक्जेन्डर सोर्लोथले गोल गर्दै खेललाई २-२ मा ल्याए।
दोस्रो हाफमा घरेलु टोलीले खेलमा नियन्त्रण बनायो ।

जुलियन आल्भारेजले ५१ औं पेनाल्टीमा गोल गर्दै अग्रता दिलाए। उनले ६३ औं मिनेटमा उत्कृष्ट फ्रि-किकमार्फत अर्को गोल थपे। एट्लेटिकोले त्यसपछि रक्षात्मक खेल अपनायो ।‌ इन्ज्युरी समयको अन्तिम चरणमा एन्टोइन ग्रिजमनले टोलीको लागि पाँचौँ गोल गर्दै जित पक्का गरे।

यो नतिजासँगै सिमियोनेको टोलीले ला लिगामा रियलविरुद्धको उत्कृष्ट प्रदर्शनलाई निरन्तरता दिएको छ। एट्लेटिको पछिल्ला ६ लिग खेलमा रियलसँग पराजित भएको छैन।