एजेन्सी – च्याम्पियन लिगमा मंगलवार रियल म्याड्रिडले काइरात अल्माटी विरुद्ध ५–० को फराकिलो जित निकालेको छ।

रियललाई जित दिलाउन किलियन एमबाप्पेले ह्याट्रिक गरे। च्याम्पियन्स लिगमा हिजो अन्य ८ खेलमा अधिकांश चर्चित क्लब विजयी भए । प्रिमियर लिगको शीर्ष टोली लिभरपुल भने पराजित भएको छ।

फ्रान्समा मार्सेलद आयाक्सलाई ४-० ले हरायो। इगोर पैक्साओले २ तथा मेसन ग्रिनवुड र पियरे एमरिक ओबामेयाङले समान १ गोल गरे।

म्याड्रिडमा एट्लेटिकोले जर्मन क्लब आइन्ट्राख्ट फ्रान्कफर्टलाई ५-१ ले हरायो। एन्टोइन ग्रिजमनले आफ्नो २ सयौं गोल पूरा गरे ।

इटालीमा एट्लान्टाले बेल्जियमको क्लब ब्रुजलाई २-१ ले पराजित गर्‍यो। पहिलो हाफमा पछाडि परेको एट्लान्टाले दोस्रो हाफमा लाजार सामार्द्जिकको पेनाल्टी र मारियो पासालिचको अन्तिमतिरको गोलबाट जित निश्चित गर्‍यो।

जर्मनीको बायर्न म्युनिखले साइप्रसको पाफोसलाई ५-१ ले हरायो। ह्यारी केनले २ तथा राफाएल गुरेरो र निकोलास जाक्सनले गोल गरे।

इस्तानबुलमा गालातासारेले इंग्ल्यान्डको लिभरपुललाई १–० ले हरायो। भिक्टर ओसिम्हेनले पेनाल्टीमार्फत निर्णायक गोल गरे। लिभरपुलले बल नियन्त्रणमा राखेपनि अवसरलाई गोलमा परिणत गर्न सकेन।

लन्डनमा चेल्सीले बेन्फिकालाई १-० ले पराजित गर्‍यो।
नर्वेको बोडो/ग्लिम्ट र टोटनहमबीचको खेल २-२ को बराबरीमा टुंगियो। घरेलु टोलीले अग्रता लिए पनि अन्त्यतिर टोटनहम खेलमा फर्कन सफल रह्यो।

इटालीको इन्टर मिलानले स्लाभिया प्रागलाई ३-० ले हरायो। इन्टरले सुरुदेखि खेल नियन्त्रणमा राख्दै सहज जित निकाल्यो।