काठमाडौं (हाम्रो खेलकुद)- भियतनाम विरुद्धको एएफसी एसियन कप छनोट खेल्न नेपाली राष्ट्रिय फुटबल टोली मंगलवार त्यसतर्फ जाने भएको छ।

राष्ट्रिय खेलकुद परिषद्का सदस्य सचिव टंकलाल घिसिङ र अखिल नेपाल फुटबल संघ (एन्फा) का पदाधिकारी एवम् सदस्यले नेपाली टोलीलाई आज बिदाइ गरे। उप कप्तान रोहित चन्दले नेपालको झण्डा ग्रहण गरे।

नेपालले भियतनामसँग होम र अवे दुवै खेल खेल्नेछ।तुलनात्मक रूपमा नेपाल भन्दा बलियो भियतनाम विरूद्ध खेल्न यो पटक फरक तयारी भएको प्रशिक्षक म्याट रोसले बताए। उनले केहि खेलाडी बंगलादेश र माल्दिभ्समा रहेको कारण केहि दिन अगाडि मात्र टोली जोडिएको बताए।

यो पटक दशैंको लागि पनि मात्र दुई दिनको बिदा दिइएको थियो। टोली राम्रो स्थितिमा रहेकोले सकरात्मक नतिजाको लागि खेल्ने रोसले बताए।

उप कप्तान रोहितले लिग नभएको कारण खेलाडीको फिटनेसमा केहि कमजोर रहेपनि सक्दो प्रयास गर्ने बताए। साथै उनले होम म्याच एडभान्टेज हुने भएपनि नेपालले यो मौका निरन्तर गुमाउनु दुःखद भएको बताए ।

दशरथ रंगशाला एसियाली फुटबल महासंघ (एएफसी) ले अन्तराष्ट्रिय प्रतियोगिताको लागि अयोग्य घोषित गरेको वर्ष बितिसकेको छ। तर रङ्गशालालाई योग्य बनाउन अझै सरोकारवालाहरू उदासिन देखिएका छन्।

यही कारण भियतनाम विरूद्धको होम र अवे दुवै खेल नेपालले भियतनाममा नै खेल्नेछ। खेल असोज २३ र २८ गते (अक्टोबर ९ र १४ ) हुनेछ।

समूह ‘एफ’ मा रहेको नेपालले यसअघि लाओससँग २-१ र मलेसियासँग २-० को हार बेहोरेको थियो। यही कारण छनोटको लागि भियतनाम विरूद्धको खेल निकै महत्वपूर्ण रहनेछ।

साथै मलेसिया विरूद्धको खेलको नतिजा नेपालको पक्षमा आउने संभावना पनि रहेको छ। मलेसियाले अयोग्य खेलाडी खेलाएको भन्दै लाओसले एएफसीमा उजुरी दिएको छ। यदि यो सदर भएमा मलेसिया विरूद्धको नतिजा नेपालको पक्षमा आउनेछ।

नेपालले पछिल्लो पटक तयारीको क्रममा बंलादेशसँग दशरथ रङ्गशालामा मैत्रिपुर्ण खेल खेलेको थियो। खेल बराबरीमा सकिएको थियो।‌ दोस्रो खेल जेन-जी प्रदर्शनको कारण हुन सकेन ।

टोलीका कप्तान किरण चेम्जोङ र लाकेन लिम्बु सिधै भियतनाम पुग्नेबताइएको छ । टोलीमा २३ खेलाडी, प्रशिक्षणसहित ४० जना रहेको बताएको छ।

नेपाली राष्ट्रिय फुटबल टोली

किरण चेम्जोङ (कप्तान),अभिषेक लिम्बु, अनन्त तामाङ, अञ्जन विष्ट, एरिक विष्ट, आयुष घलान, विमल पाण्डे, विशाल सुनार, दीप कार्की , दिनेश हेंजन, जिलेस्पी जङ्ग कार्की, कृतिश रत्न छुन्जु, कुशल देउबा, लाकेन लिम्बु, मणी कुमार लामा, मनीष डाँगी, रोहित चन्द, रोहन कार्की, सनिश श्रेष्ठ, सुवास ठाकुरी बम, सुमित श्रेष्ठ, सुमन श्रेष्ठ र योगेश गुरुङ।