काठमाडौं (हाम्रो खेलकुद)– गैर आवासीय नेपाली संघ (एनआरएनए) अष्ट्रेलिया ले तीन नेपाली खेलाडीलाई आइतबार सम्मान गर्ने भएको छ । नेपाली राष्ट्रिय भलिबल टोलीका पूर्व कप्तान भरत शाह, राष्ट्रिय फुटबल टोलीका पूर्व कप्तान अनिल गुरुङ र स्ट्राइकर नवयुग श्रेष्ठलाई एनआरएनए अष्ट्रेलियाले आइतबार सम्मान गर्न लागेको हो ।
अष्ट्रेलिया जाने क्रममा हङकङ विमानस्थलमा बायाँबाट क्रमश – नवयुग श्रेष्ठ, भरत शाह र अनिल गुरुङ । (तस्बिर – नवयुगको इन्स्टाग्रामबाट)
लामो समय नेपाली भलिबल टोलीलाई कप्तानी गरेका भरतले केही बर्षअघि सक्रिय खेल जीवनबाट संन्यास लिएका थिए । नेपाल प्रहरीमा आबद्ध उनी अहिले पुलिसको भलिबल टोलीलाई प्रशिक्षण दिदै आएका छन् ।
लक्ष्मी हुन्डाई मनाङ मस्र्याङ्दी क्लबका कप्तान समेत रहेका अनिल र त्रिभुवन आर्मी नवयुग भने यसपटक राष्ट्रिय टोलीको भ्रमणमा थिएनन् । चैत १५ गते भएको फिलिपिन्सविरुद्ध एसियन कप छनोटमा अनिल टोलीमा अटाउन सकेनन् ।
नवयुग चोटका कारण टोलीमा परेनन् । नेपाली टोली फिलिपिन्ससँग खेलेर बुधबार राती स्वदेश फर्केको छ । त्यो खेलमा नेपाल ४–१ ले पराजित भएको थियो । तीन खेलाडी आज आइतबार अष्ट्रेलिया पुग्दैछन् ।
