बार्सिलोना (एजेन्सी) – नेयमारको प्रतिबन्धमा पुनरावलोकन गर्न कोर्ट अफ आर्बिट्रेसन (कास/टाड) समक्ष दबाव दिदै आएको बार्सिलोनाले ‘एल क्लासिको’ अघि नेयमारलाई नखेलाउने बताएको छ ।

बार्सिलोनाले आधिकारिक विवरणमा कासले खेल सुरु हुनुभन्दा १२ घण्टा अघि सम्म कुनै निर्णय नदिदा नेयमारलाई नखेलाउने बताएको छ । ‘कानुनी अनिश्चितताको बिचमा कासले खेल सुरु हुनुभन्दा १२ घण्टा पहिले सम्म कुनै निर्णय नदिदा हामीले नेयमारलाई नखेलाउने भएको छौ ‘ , बार्सिलोनाको विवरणमा लेखिएको थियो ।

स्पेनिस अपिल समितिले यसअघिको अपिल खारेज गरेपछि शुक्रबार कास समक्ष अपिल गरेको बार्सिलोनाको बुझाइ अनुसार कासले आफ्नो निर्णय प्रकट नगरेसम्म नेयमारको प्रतिबन्ध मुद्दा तामेली हुने कारणले उनले रियल म्याड्रिडसंगको खेल खेल्न पाउनु पर्ने थियो । तर कासले नेयमारलाई खेलाए बार्सिलोनाले कडा सजाय भोग्न सक्ने चेतावनी दिएपछि बार्सिलोना अन्तिम समयमा पछि हटेको हो ।

स्पेनिस ला लिगामा मालगासंगको खेलमा रातो कार्डको सामना गरेका नेयमारले रेफ्रीलाई व्यंग्यात्मक रुपमा ताली बजाउदै मैदान बाहिरिएका थिए । त्यसमा थप कारवाही स्वरुप दुई खेलमा प्रतिबन्ध गरेपछि उनले ३ खेल खेल्न नपाउने भएका छन् । ३ मध्य १ खेल भने उनले प्रतिबन्धमा बिताई सकेका छन् ।