लण्डन (एजेन्सी) – इङलिस प्रिमिएर लिग अन्तर्गत मंगलबार राती भएको खेलमा अंक तालिकाको शीर्षस्थानमा रहेको चेल्सीले साउथह्याम्पटनलाई ४-२ले पराजित गरेको छ।
खेलको पाँचौ मिनेटमै डिएगो कोष्टाको पासलाई सदुपयोग गर्दै एडेन हाजार्डले गोल गरेर चेल्सीलाई खेलमा अग्रता दिलाएका थिए। तर, खेलको २४औं मिनेटमा चेल्सीका पुर्व खेलाडी ओरिओल रोमेउले खेललाई बराबरीमा ल्याए। ग्यारी केहिलले पहिलो हाफको इन्ज्युरी समयमा गोल गरेपछि चेल्सीले हाफ टाइममा २-१को अग्रता बनाएको थियो।
दोश्रो हाफको ५३औं मिनेटमा सेस फेब्रिगासको क्रसमा हेडीङ गोल गर्दै डिएगो कोष्टाले चेल्सीको अग्रता दोब्बर पारेका थिए। कोष्टाले ८९औं मिनेटमा व्यक्तिगत दोश्रो गोल गरेपछि चेल्सीको जित पक्का भएको थियो। साउथह्याम्पटनका लागि ९०औं मिनेटमा चेल्सीकै अर्का पुर्वखेलाडी रायन बर्टर्यान्डले सान्त्वना गोल गरे।
उपाधि दौडमा अग्रपंक्तिमा रहेको चेल्सीले यस जितसंगै दोश्रो स्थानमा रहेको टोटेनहमसंग ७ अंकको अग्रता कायम गरेको छ। यद्दपी टोटेनहमले चेल्सीभन्दा १ खेल कम खेलेको छ। उसले बुधबार क्रिस्टल प्यालेसको सामना गर्दैछ।
