म्याड्रिड (एजेन्सी) – गत साता सम्पन्न एल क्लासिकोमा लियोनेल मेस्सीको अन्तिम मिनेटको गोलसंगै बार्सिलोनाले रियल म्याड्रिडलाई ३-२ले पराजित गर्दै लिग तालिकाको शीर्षस्थानमा पुगेको थियो।
मेस्सीले खेलको दोश्रो हाफको इन्ज्युरी समयको अन्तिम मिनेटमा गरेको गोल सर्जी रोबर्टोले मिडफिल्डबाट उत्कृष्ट ढंगले बल अघि बढाएपछि सम्भव भएको थियो। रोबर्टोले बल छलाएर लाग्दा म्याड्रिडका डिफेन्डर मार्सेलो र मिडफिल्डर लुका मोड्रीचले उनलाई रोक्ने प्रयास विफल भएको थियो।
रोबर्टोले राइट ब्याक पोजिसनबाट बल छलाउँदै म्याड्रिडको हाफ भित्र आन्द्रे गोमेसलाई पास दिएका थिए। त्यसपश्चात गोमेसले जोर्डी अल्बालाई बक्सभित्र पास दिएका थिए। अल्बाले उत्कृष्ट ढंगले कट्ब्याक गरेको बलमा मेस्सीले उत्कृष्ट गोल गरेका थिए।
यहि निहुँमा मैदानमा छँदै रोनाल्डोले मार्सेलो र मोड्रीच दुवैलाई गाली गरेका थिए। खेल सकिएलगत्तै रोनाल्डो र मार्सेलोबीच टनेलमा केहि भनाभन भएको र ड्रेसिङ रुममा पुगेर उनले फेरी मार्सेलो र मोड्रीचसंग आफ्नो असन्तुष्टी व्यक्त गरेका थिए।
उनले २ मध्ये कुनै एक खेलाडीले उक्त समयमा रोबर्टोलाई फल हान्नुपर्ने अभिव्यक्ति दिएको बुझिएको छ।
