लण्डन (एजेन्सी) – इङलिस प्रिमिएर लिग अन्तर्गत बुधबार राती भएका खेलमा टोटेनहम हट्सपर र आर्सनलले जित दर्ता गरेका छन्।
प्रिमिएर लिगको शीर्षस्थानमा रहेको चेल्सीमाथि दबाब कायम राख्ने अठोट लिएको टोटेनहमले क्रिस्टल प्यालेसको घरेलु मैदानमा १-०को जित दर्ता गर्यो। खेलको अधिकाँश समय घरेलु टोलीमाथि आक्रमण बुनेको टोटेनहमका लागि क्रिस्टियन एरिक्सनले गोल गरेका थिए। उनले ८२औं मिनेटमा करिब ३० यार्ड टाढाबाट हानेको सट सिधै गोलमा परिणत भएको थियो।
जितसंगै टोटेनहम र चेल्सीबिचको दुरी ४ अंकमा झरेको छ। दुवै टोलीले लिगमा ५/५ खेल खेल्न बाँकि रहेको छ।
यसैगरी दिनको अर्को खेलमा आर्सनलले लेस्टरमाथि १-०को जित हात पार्यो। खेलको ८६औं मिनेमा लेस्टरका रोबर्ट हुथले आत्मघाती गोल गरेपछि आर्सनलको जित सम्भव भएको हो। यस जितसंगै आर्सनलको शीर्ष ४मा आउने सम्भावना थप बलियो भएको छ। ३२ खेलमा ६० अंक जोडेको आर्सनल हाल छैठौं स्थानमा रहेको छ।
बुधबारकै अर्को खेलमा मिडल्सब्रोले सन्डरल्याण्डलाई १-०ले पराजित गर्यो।
