म्यानचेस्टर (एजेन्सी) – प्रिमियर लिगको अग्रस्थानमा रहेको म्यानचेस्टर सिटी आज राति तालिकाको तेर्हौंमा रहेको स्टोक सिटीको सामना गर्दै छ । खेल नेपाली समय अनुसार ७.४५ बजे सुरु हुने छ ।
लिगको पछिल्ला ५ खेलमा २० गोल गर्दै सिटीले ती सबैमा जित हांसिल गरेको छ । आफ्ना स्टार फरवार्ड सर्जियो अगुएरोको अनुपस्थितिमा पनि सिटीले चेल्सीलाई १-० ले हराएको थियो ।
गाडि दुर्घटनापश्चात मङ्गलबार सामान्य प्रशिक्षण गरेका अगुएरो यस खेलमा भने देखा पर्ने छैनन् । त्यस्तै डिफेन्डरद्वय भिन्सेन्ट कम्पनी र बेन्जामिन मेन्डी पनि सिटीका लागि घाइते रहेका छन् ।
लगातार चार खेलमा जितविहिन रहेको स्टोकले अघिल्लो खेलमा साउथह्याम्पटनलाई २-१ ले हराउँदै सो यात्रा टुङ्ग्याएको थियो । स्टोकका लागि जो एलेन वेल्सबाट खेल्दा घाइते भएका थिए भने रायन शक्रस र ब्रुनो मार्टिन इन्डि पनि घाइते रहेका छन् ।
यस सिजन आर्सनललाई हराएका कारण स्टोक अर्को उपाधि दाबेदार म्यानचेस्टर सिटीलाई निराश पार्ने दाउमा हुने छ । तर निकै राम्रो लयका कारण र स्टोकविरुद्ध पछिल्ला २० खेलमा केवल दुईमा पराजित भएकोले यस खेलमा म्यानचेस्टर सिटीकै जितको सम्भावना धेरै देखिन्छ ।
