लण्डन (एजेन्सी) – निकै खराब लयबाट गुज्रिरहेको क्रिस्टल प्यालेस आज राति प्रिमियर लिगमा साविक विजेता चेल्सीको सामना गर्दै छ । प्यालेसको घरेलु मैदान सेलहर्स्ट पार्कका खेलिने सो खेल नेपाली समय अनुसार ७.४५ बजे सुरु हुने छ ।
क्रिस्टल प्यालेसका गोलकिपर वायन हेनेसी र कप्तान स्कट ड्यान घाइते रहेकाले नखेल्न सक्ने सम्भावना छ । लोनको सम्झौताका कारण रुबेन लफ्टस-चीक तथा घाइते रहेका कारण क्रिस्टियन बेन्टेके पनि यस खेलमा उपलब्ध हुने छैनन् । तर चोटबाट फर्किरहेका मिडफिल्डर विल्फ्रिड जाहाले टोलिलाई यस सिजनको पहिलो अंक जिताउने झिनो आशा सँगै ल्याउने छन् ।
सात खेलमा १३ अंकसहित तालिकाको तेस्रो स्थानमा रहेको चेल्सीका पनि मुख्य खेलाडिहरु घाइते रहेका छन् । एन्गोलो कान्टे अन्तर्राष्ट्रिय खेलमा घाइते भएका थिए भने एल्भारो मोराटा म्यानचेस्टर सिटीसँगको अघिल्लो खेलमा घाइते भएका थिए । त्यस्तै डिफेन्डर डेभिड लुइज भने प्रतिबन्धबाट फर्किँदै छन् ।
यस सिजन क्रिस्टल प्यालेसले ७ खेलमध्ये सबै खेल गुमाउँदै एक गोल पनि गर्न सकेको छैन । अर्को तर्फ लिगका पछिल्ला ९ मध्ये चेल्सीले ८ खेलहरुमा जित हांसिल गरेको छ भने प्यालेसको घरेलु मैदानमा चेल्सीले ६ मध्ये ५ मा पनि जित्न सफल भएको छ ।
चेल्सी जस्तै उपाधि दाबेदार रहेको टोटनह्याम हटस्परले बोर्नमाउथलाई वेब्लीलाई निम्त्याउँदै छ । १४ खेल जोड्दै टोटनह्याम तालिकाको तेस्रोमा रहेको छ र ७ खेलमा ४ अंकसहित बोर्नमाउथ १९ औँ स्थानमा रहेको छ । सो खेल नेपाली समय अनुसार ७.४५ बजे नै सुरु हुने छ ।
