टोटेनह्याम (एजेन्सी)– क्रिस्टियन इरिक्सनले दोस्रो हाफमा गरेको गोलमा टोटेनह्यामले आज प्रिमियर लिगमा बोर्नमाउथलाई १–० ले हराएको छ । वेम्ब्ली रंगशालामा पहिलो जित दर्ता गराएपछि टोटेनह्याम १७ अंकसहित तालिकाको तेस्रो स्थानमा उक्लेको छ ।
इरिक्सनले दोस्रो हाफको दोस्रो मिनेटमा गोल गरेका थिए । पेनाल्टी बक्सबाट उनले गोल गरेका हुन् । यो सिजनको उनको तेस्रो गोल हो । घरेलु मैदानमा सिजनको पहिलो गोलका लागि हेरि केन दुई पटक सम्म नजिक पुगे, तर सफल भने हुन सकेनन् । ८ खेलमा ४ अंक मात्र जोड्न सकेको बोर्नमाउथ अंकतालिकाको पुछारबाट दोस्रो स्थानमा छ ।
आजै भएका अन्य खेलमा स्वान्सी सिटीले हर्डरफिल्ड टाउनलाई २–० ले हरायो भने बनर्ली र वेस्ट ह्याम युनाइटेडले १–१ को बराबरी खेले । चेल्सी क्रिस्टल प्यालेससँग २–१ ले स्तब्ध हुँदा म्यानचेस्टर सिटीले स्टोट सिटीलाई ७–२ ले पराजित गर्यो । त्यसअघि लिभरपुल र म्याचेस्टर युनाइटेडले गोलरहित बराबरी खेले ।
