गेटाफे (एजेन्सी)– क्रिस्टियानो रोनाल्डोले खेलको अन्त्यतिर गोल गरेपछि रियल म्याड्रिडले शनिबार गेटाफेलाई २–१ ले हराएको छ । त्यो जित पछि रियल अंकतालिकाको दोस्रो स्थानमा उक्लेको छ ।

घाइते गेराथ बेल विना उत्रेको रियलले पाँचौं स्थानमा रहँदै शनिबारको खेल सुरु गरेको थियो । करिम बेन्जिमाको गोलबाट रियलले ३९ औं मिनेटमा अग्रता लिएको थियो । तर, ५६ औं मिनेटमा जर्ज मोलिनाले गोल फर्काउँदै खेललाई बराबरीमा पुर्याएका थिए ।

दुई यार्डबाट पनि गोल गर्न चुकेका रोनाल्डोले अन्ततः खेल सकिन ५ मिनेट बाँकी रहँदा गोल गरे र खेलको निर्णायक गोल त्यहि बन्यो । सबै प्रतियोगितामा गरि रियलको त्यो लगातार चौथो जित थियो । १ खेल कम खेलेको बार्सिलोना भन्दा रियल अझै ४ अंकले पछाडि छ । बार्सिलोनाले शनिबार अवे खेलमा एट्लेटिको म्याड्रिडको सामना गर्दैछ ।

रोनाल्डो पाँच खेलेको प्रतिबन्ध पछि केही दिनअघि मात्र ला लिगामा फर्केका थिए । बार्सिलोना विरुद्ध अगस्ट १४ मा सुपर कपमा रेफ्रीलाई धक्का दिएपछि रोनाल्डो ५ खेल प्रतिबन्धमा बिताएका थिए । च्याम्पियन्स लिग र ला लिगाको विजेता समेत रहेको रियलले रोनाल्डोको अनुपस्थितिमा मिश्रित खाले परिणाम निकालेको थियो ।

सेप्टेम्बर २० मा रोनाल्डो प्रतिबन्ध मुक्त भएर फर्केको खेलमा रियल बेटिससँग रियल १–० ले स्तब्ध भएको थियो । रियलले मंगलबार च्याम्पियन्स लिगको समूह चरणमा टोटेनह्यामको सामना गर्दैछ ।