डिजोन (एजेन्सी) – फ्रान्सेली लिग १ मा गए राती पेरिस सेन्ट जर्मन (पिएसजी) ले डिजोनमाथि २-१ को संघर्षपूर्ण जित निकालेको छ । पिएसजीको जितमा दुवै गोल डिफेन्डर थोमस म्युनियरले गरेका थिए ।
मुख्य स्ट्राइकर एडिन्सन काभानी बिना उत्रेको पिएसजी आक्रमणमा अरु बेलाभन्दा केहि फितलो देखिएको थियो । नेयमारले गरेको प्रहार रिबाउन्ड भएर फर्किँदा म्युनियरले सो मौका सदुपयोग गर्दै पिएसजीलाई ७० औं मिनेटमा खेलमा अग्रता दिलाएका थिए ।
भ्रमणकारी टोलीलाई म्युनियरले अग्रता दिलाउन अघि ड्यानि एल्भेस र मार्क्युनोसका प्रहार पोस्टमा लागेको थियो भने नेयमार र किलियन बाप्पेका केही प्रहारलाई डिजोनका गोलकिपरले बचाऊ गरेका थिए । तर खेलको ८७ औं मिनेटमा डिजोनका बेन्जामिन जेनोटको ३० यार्ड भलिले जाली चुम्दा घरेलु टोली पिएसजीसँग अंक बाँड्न नजिक पुगेको थियो ।
इन्ज्युरी समयमा भने बाप्पेको सुन्दर पासलाई फेरी म्युनियरले गोलमा परिणत गर्दै पिएसजीलाई अन्तिम समयमा जित दिलाउन सफल भएका थिए । यस सिजन खेलिएका ९ खेल मध्ये पिएसजीले ८ जित र एक बराबरी खेल्दै २५ अंक बटुलेको छ ।
दोस्रो स्थानमा रहेको साविक विजेता मोनाकोभन्दा पिएसजी ६ अंकले अगाडि रहेको छ । मोनाको लियोनसँग शुक्रबार ३-२ ले पराजित भएको थियो । डिजोन भने ९ खेलमा ६ अंकसहित तालिकाको १८ औं स्थानमा झरेको छ ।
