म्यानचेस्टर (एजेन्सी) – च्याम्पियन्स लिगको समूह एफमा आज म्यानचेस्टर सिटी र नेपोली भिड्दै छन् । सिटीको घरेलु मैदान एतिहाड स्टेडियममा खेलिने यस खेल आज राति नेपाली समय अनुसार १२.३० बजे सुरु हुने छ ।

म्यानचेस्टर सिटीका लागि डिफेन्डर भिन्सेन्ट कम्पनी र बेन्जामिन मेन्डि घाइते रहेकाले यस खेलमा सहभागि हुने छैनन् । त्यस्तै कार दुर्घटनामा परेर घाइते भएका फरवार्ड सर्जियो अगुएरो भने तोकिएको समयअगावै स्वस्थ हुँदै यस खेलमा उपलब्ध हुने छन् ।

नेपोलीका लागि भने अर्काडिउज मिलिक चोटका कारण उपलब्ध हुने छैनन् । आ–आफ्ना घरेलु लिगमा दुवै टोली निकै आक्रामक देखिएकाले यस खेल रोमञ्चक हुने अनुमान गर्न सकिन्छ । सिटी इङ्ग्लिस प्रिमियर लिगको र नेपोली इटालियन सेरीआको शीर्ष स्थानमा रहेका छन् ।

त्यस्तै अर्को इङ्ग्लिस टोली लिभरपुल समूह ईमा मेरोबोरको सामना गर्दै छ । लिभरपुलका लागि साडियो माने हाल चोटका कारण बाहिर छन् भने मेरिबोरका लुका जाहोभिच र डेर भर्सिच चोटपछि टोलीमा आगमन गर्दै छन् ।

आज राति च्याम्पियन्स लिगका अन्य खेलहरु (नेपाली समय अनुसार):

मोनाको विरुद्ध बेसिक्टास – १२.३० बजे

आरबि लेपजिग विरुद्ध पोर्टो – १२.३० बजे

फेयेनूर्ड विरुद्ध शाख्तार दोनेस्क – १२.३० बजे

स्पार्टाक मस्को विरुद्ध सेभिल्ला – १२.३० बजे

एपोएल निकोसिया विरुद्ध बोरुसिया डर्टमन्ड – १२.३० बजे