काठमाडौं (हाम्रो खेलकुद) – युनाइटेड अरब इमिरेट्स (युएई) विरुद्ध १–० को हारसँगै नेपाली युवा टोली एएफसी यू–१९ च्याम्पियनसिप फुटबलको छनोट चरणबाटै बाहिरिएको छ ।
अघिल्लो चरण पुग्ने सम्भावनालाई जीवित राख्न नेपाललाई आजको खेल जित्नै पर्ने दबाब थियो । तर यस हारले नेपालको यात्रामा पूर्णविराम लगाएको छ ।
नेपाल आफ्नो पहिलो खेलमा आयोजक किर्गिस्तानसँग २–० र दोस्रो खेलमा बहराइनसँग ४–० ले पराजित भइसकेको थियो । नेपालले युएईलाई पहिलो हाफसम्म गोलरहित बराबरीमा रोके पनि दोस्रो हाफमा भने एक गोल खान पुग्यो ।
युएईका अल्फान अल्सान आमादीले ७२ औं मिनेटमा गरेको गोल नै युएईको जितमा निर्णायक बन्यो । अल्सानले नेपाली डिफेन्डरको गल्तीको फाइदा उठाउँदै डि–बक्सभित्रबाट गोल गर्न सफल भएका थिए । खेलभरी नै नेपाल युएईको दबाबमा खेलेको थियो र अन्त्यतिर गोल गर्ने सुन्दर मौका पनि खेर फालेका थियो ।
युएईसँगको यस हारसँगै समूह ‘ए’ मा अंकविहीन रहँदै नेपाल पुछारमा छ । नेपालले अन्तिम खेल कात्तिक २२ मा ओमानसँग खेल्नेछ । छनोटमा समूहको शीर्ष स्थानमा रहने टोली सोझै फाइनलमा प्रवेश गर्नेछन् । त्यस्तै दश समूहका विजेता र सबै समूहबाट उत्कृष्ट ५ उपविजेता राष्ट्रले आयोजकसँगै अन्तिम चरणमा प्रतिस्पर्धा गर्नेछन् ।
