बार्सिलोना (एजेन्सी) – गए राति स्पेनिश ला लिगामा अंकतालिकाको अग्रस्थानमा रहेको बार्सिलोनाले सेभिल्लालाई २-१ ले हराएको छ । बार्सिलोनाको जितमा फरवार्ड पाको अल्कासेरले दुई गोल गरेका थिए ।
लियोनल मेस्सी र लुइस स्वारेजलाई अग्रपंक्तिमा साथ दिँदै अल्कासेरले खेलको २३ औं मिनेटमै घरेलु टोलीलाई अग्रता दिलाएका थिए । स्वारेजको लामो पासलाई कन्ट्रोल गर्दै उनले स्कोर १-० बनाएका थिए ।
त्यस्तै दोस्रो हाफको ५९ औं मिनेटमा भने सेभिल्ला खेलमा फर्केको थियो । एभर बानेगाको कर्नरमा गुइडो पिजारोले गोल गर्दै खेललाई बराबरीमा ल्याएका थिए । तर सेभिल्लाको सो खुसी केहि मिनेटका लागि मात्र टिक्यो ।
खेलको ६५ औं मिनेटमा इभान राकिटिचको राम्रो पासबाट फेरि अल्कासेरले गोल गर्दै आफ्नो टोलीको जित सुनिश्चित गरेका थिए । यस जितसँगै बार्सिलोनाले आफ्नो सिजनको अपराजित यात्रा पनि कायम राखेको छ ।
बार्साको ११ खेलमा ३१ अंक रहेको छ । त्यस्तै १९ अंकसहित सेभिल्ला भने अहिलेको लागि पाँचौं स्थानमा यथावत् रहेको छ ।
गए राति ला लिगाको अन्य खेलहरुको नतिजा:
भ्यालेन्सिया ३-० लेगानेस
डेपोर्टिभो ०-१ एट्लेटिको म्याड्रिड
आलाभेस १-० इस्पान्योल
