लण्डन (एजेन्सी) – गए राति प्रिमियर लिगमा लिभरपुलेले वेस्ट ह्याममाथि ४-१ को सहज जित दर्ता गरेको छ । यस जितमा लिभरपुलका विङ्गर मोहम्मद सालाहले दुई गोल गरेका थिए ।
खेलको २३ औं मिनेटमा चोटबाट फर्केका स्टार खेलाडि साडियो मानेको पासमा सालाहले गोल गर्दै भ्रमणीय टोलीलाई अग्रता दिलाएका थिए । सो गोलको तीन मिनेटभित्रै डिफेन्डर जोएल माटिपले लिभरपुलको अग्रता दोब्बर बनाएका थिए ।
दोस्रो हाफमा वेस्ट ह्यामका म्यानुयल लान्जिनीले एक गोल फर्काए पनि एलेक्स अक्सलेड चेम्बरलेन र सालाहले पुन: गोल गर्दै लिभरपुलको शानदार जित तथा पूरा ३ अंक सुनिश्चित गरे।
यस जितसँगै ११ खेलमा १९ अंकका साथ लिभरपुल अंक तालिकाको छैठौं स्थानमा यथावत् रहेको छ भने वेस्ट ह्याम ११ खेलमा ९ अंकसहित तालिकाको १७ औं स्थानमा रहेको छ ।
गए राति प्रिमियर लिगका अन्य खेलहरुको नतिजा:
लेस्टर सिटी २-२ स्टोक सिटी
हडर्सफिल्ड १-० वेस्ट ब्रोम
न्युक्यासल युनाइटेड ०-१ बोर्नमथ
साउथह्याम्प्टन ०-१ बर्नली
स्वान्सि सिटी ०-१ ब्राइटन
