डर्टमन्ड (एजेन्सी) – गए राति जर्मन बुन्डेस लिगामा साविक विजेता बायर्न म्युनिखले बोरुसिया डर्टमन्डलाई ३-१ ले हराएको छ । बायर्नको जितमा आर्यन रोब्बेन, रोबर्ट लेवान्डोस्की र डेभिड अलाबाले गोल गरेका थिए ।
बायर्न डर्टमन्डको घरेलु मैदानमा खेलको नवौं मिनेटमै गोल गर्न सफल भएको थियो । मिडफिल्डर जेम्स रोड्रिगेजको पासमा रोब्बेनले गोल गर्दै स्कोर १-० बनाएका थिए ।
त्यस्तै पहिलो हाफको ३७ औं मिनेटमा जोसुवा किमिचको पासमा लेवान्डोस्कीले गोल गर्दै आफ्नो टोलीको अग्रता दोब्बर बनाएका थिए । सो गोल लेवान्डोस्कीको यस लिग सिजनको एघारौं गोल थियो ।
त्यस्तै अलाबाले रोड्रिगेजको पासमा खेलको ६७ औं मिनेटमा गोल गर्दै बायर्नका लागि जित लगभग सुनिश्चित गरे । खेलको अन्तिम समयतिर भने डर्टमन्डका डिफेन्डर मार्क बार्टाले डर्टमन्डका लागि एक सान्तवना गोल फर्काएका थिए ।
यस जितसँगै ११ खेलमा २६ अंक रहेको बायर्न तालिकाको अग्रस्थानमा यथावत् छ । शीर्ष स्थानमा जाने मौका गुमाएको डर्टमन्ड तेस्रोमा झरेको छ । त्यस्तै हानोभरलाई गए राति २-१ ले हराएको आरबी लेपजिग भने दोस्रोमा उक्लेको छ ।
