लण्डन (एजेन्सी) – प्रिमियर लिगमा दोस्रो स्थानमा रहेको म्यानचेस्टर युनाइटेड आज चेल्सीसँग भिड्दै छ । आज राति नेपाली समय अनुसार १०.१५ बजे सुरु हुने यस खेल चेल्सीको घरेलु मैदान स्ट्यामफोर्ड ब्रिजमा खेलिने छ ।
चेल्सीका लागि मिडफिल्डर एन्गोलो कान्टे टोलीमा फर्कँदै छन् भने डिफेन्डर सेजार एज्पिलिक्वेटा घाइते रहेका छन् । त्यसैले एन्टोनियो रुडिगरले यस खेलमा स्थान पाउने देखिन्छ ।
अर्को तर्फ युनाइटेडका लागि मिडफिल्डर मरोएने फेलाइनी टोलीमा फर्कँदै छन् । त्यस्तै जेसे लिन्गार्ड भने सामान्य चोटका कारण खेलमा सहभागी नहुने देखिन्छ ।
ठूला खेलहरुमा युनाइटेडका प्रशिक्षक जोसे मौरिन्होले रक्षात्मक खेल खेल्ने भएकाले अवे टोलीबाट सोहि शैलीको अपेक्षा गर्न सकिन्छ । दुई लगातार हारपछि दुई खेल जितेको चेल्सी भने लिगमा आफ्नो जितको यात्रालाई निरन्तरता दिन खोज्ने छ ।
युनाइटेडले प्रिमियर लिगका पछिल्ला ३८ खेलमा तीन खेलमा मात्र पराजय भोगेको छ । त्यस्तै चेल्सीसँगका पछिल्ला ६ खेलमा भने युनाइटेड एकमा मात्र जित दर्ता गर्न सफल रहेको छ ।
