प्रकाश तिमल्सिना
ढाका – नेपाल रहेको साफ सुजुकी कप (साफ च्याम्पियनसिप) को समूहमा आयोजक बंगलादेशले लागतार दोस्रो खेल जितेको छ । बंगलादेशले बिहीबार पाकिस्तानलाई १–० ले हराउँदै अघिल्लो चरणो यात्राको सम्भावनालाई सहज बनाएको छ ।

खेल सकिन ५ मिनेट अघि टोपु बरमानले हेडमार्फत गोल गर्दै बंगलादेशलाई अग्रता दिलाएका थिए । त्यहि गोल खेलको निर्णायक बन्यो । त्यसअघि नेपालले भुटानमाथि ४–० को जित हासिल गर्दै अघिल्लो चरणको सम्भावनालाई जीवित राखेको थियो । यस समूहबाट सबै टोलीको सेमिफाइनल पुग्ने गणितीय सम्भावना कायम छ ।

समूहबाट बंगलादेश अघिल्लो चरण पुग्ने सम्भावना सबै भन्दा बलियो छ । नेपाल र पाकिस्तानको समान ३ अंक छ भने भुटान अंक बिहिन छ । समूह चरणको अन्तिम दिन शनिबार नेपाल र बंगलादेश तथा पाकिस्तान र भुटानबीच प्रतिस्पर्धा हुनेछ ।

अब नेपालका लागि बंगलादेशको खेल निर्णायक हुनेछ । बंगलादेश र नेपाल खेल्नुअघि सोहि दिन पाकिस्तान र भुटानबीच प्रतिस्पर्धा हुनेछ । पाकिस्तानले भुटानलाई हराएमा नेपालले बंगलादेशलाई हराउनै पर्ने बाध्यता हुनेछ । भुटानले पाकिस्तानलाई हराएको खण्डमा भने नेपालले बंगलादेशसँग बराबरी खेलेपनि अघिल्लो चरण पुग्नेछ ।

 

अंक तालिका

क्र.स.  टिम           खेल    जित     बराबर    हार          गोल        अंक
१.      बंगलादेश     २          २           १            ०          ३ -०         ६
२.      नेपाल           २         १         ०            १           ५–२          ३
३.     पाकिस्तान    २       १           १           २            २-२            ३

४.     भुटान           २         ०         ०            २           ०–६          ०