काठमाडौं (हाम्रो खेलकुद) – राष्ट्रिय टोली तथा एपीएफ डिफेन्डर आदित्य चौधरी दुर्घटनामा परेको कारण अहिले मैदानबाहिर छन् । तर एपीएफका प्रशिक्षक राजेन्द्र तामाङले भने उनको स्थितिबारे सोध्दा आदित्य सम्पर्कविहिन रहेको बताए ।

एपीएफले सोमबारको खेलमा फ्रेन्ड्स क्लबलाई १-० ले पराजित गर्यो । खेलपछि पत्रकार सम्मेलनमा बोल्दै प्रशिक्षक तामाङले आदित्य क्लबसँग सम्पर्कमा नआएको बताए । ‘आदित्य पछिल्लो समय हाम्रो सम्पर्कमा छैन । हामीले उनलाई खेल्नका लागि अनुरोध गरेका थियौ । सम्पर्कमा आएन,’ तामाङले थपे, ‘उनी हाम्रो लागि चाहिने खेलाडी हो । नआएपछि हामीले केही भन्न सक्दैनौ । बाध्यतामै खेल्न बोलाए गाह्रो हुनसक्छ । सम्पर्कमा किन आएन त्यो हामीलाई थाहा भएन ।’

तर आदित्यले भने आफू दुर्घटनामा परेर घाइते भएको र क्लबलाई पनि यसबारे जानकारी दिएको बताए । ‘ म सिक्किमको प्रतियोगिता खेलेपछि घर फर्कें । अघिल्लो साता सामान्य दुर्घटनामा पर्दा मेरो घुँडामुनि चोट लागेको छ । अहिले चोट ठिक भएको छ तर मैदान फर्कन अझै केहि समय लाग्छ,’ आदित्यले भने । उनले क्लबलाई पनि आफ्नो स्थितिबारे जानकारी दिएको र सकेसम्म चाँडो मैदान फर्कन प्रयासरत रहेको बताए ।

आदित्यले लिगको पहिलो खेलमा हिमालयन शेर्पाविरुद्ध भने सुरुवाती रोजाईमा खेलेका थिए । उनले साफ च्याम्पियनसिपमा राष्ट्रिय टोलीबाट पनि पहिलो रोजाईमा रहँदै खेलेका थिए । उनले भारतको सिक्किममा आयोजित गभर्नर्स गोल्डकपमा एपीएफ पहिलो खेलमा पराजित हुँदा पनि क्लबबाट खेलेका थिए ।