काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत शुक्रबार तीन खेल भए । ब्रिगेड ब्वाइजले लिगको पहिलो जित दर्ता गर्दा आर्मी र संकटाले पनि अपराजित यात्रा कायम राख्दै अंक तालिकामा उकालो लाग्ने क्रमलाई जारी राखे ।

आर्मीका सन्तोष तामाङ सट प्रहार गर्दै

पहिलो खेलमा ब्रिगेड ब्वाइजले १ गोलले पछाडी पारेको स्थितिलाई उल्टाउँदै एपीएफलाई ३-१ ले पराजित गर्यो । ६० औं मिनेटमा रुप बहादुर लामाले एपीएफलाई अग्रता दिलाएका थिए । पेनाल्टी क्षेत्रबाहिर रुपले गरेको प्रहार डिफ्लेकट हुँदै गोलमा परिणत भएको थियो । त्यसको तीन मिनेटमा नै ब्रिगेड ब्वाइजले बराबरी गोल फर्कायो । मनोज राईले २० यार्ड टाढाबाट फ्रिकीकमा गोल गरे ।

ब्रिगेड ब्वाइजका लागि ६९ औं मिनेटमा काजुदीन आदुउनीले ६ यार्ड बक्सभित्र बाट गोल गर्दै ब्रिगेड ब्वाइजलाई अग्रता दिलाए । काजिम आदिबोकेले ७५ औं मिनेटमा विजयी गोल गरे । उनले पेनाल्टी क्षेत्रबाहिर बाट उत्कृष्ट भली गोल गर्दै जित पक्का गरे । खेलको ८९ औं मिनेटमा एपीएफका विश्वास उदासले सिधा रातो कार्ड पाएपछि एपीएफ १० खेलाडीमा सिमित भएको थियो ।

रुपबहादुर लामा

दोस्रो खेलमा टेकबहादुर बुढाथोकीको पहिलो हाफको गोलमा त्रिभुवन आर्मीले नेपाल पुलिस क्लबलाई १-० ले पराजित गर्यो । खेलको ३१ औं मिनेटमा टंक बस्नेतले दायाँ विङ्सबाट गरेको क्रसलाई पेनाल्टी क्षेत्रभित्र रहेका कप्तान भरत खवासले छाडेपछि टेकबहादुरले गोलरक्षकलाई बिट गर्दै गोल गरेका थिए ।

हल्चोकस्थित एपीएफ रंगशालामा भएको खेलमा संकटाले मछिन्द्रलाई २-० ले हरायो । संकटाले खेलको ६४ औं मिनेटमा नितिन थापाको गोलमा अग्रता बनाएको थियो । लक्ष्मण रुचालले पेनाल्टी क्षेत्रको बायाँ भागबाट दिएको क्रसमा नितिनले फार पोस्टमा डाइभिङ हेडर गर्दै अग्रता दिलाएका थिए । ८५ औं मिनेटमा गोलरक्षक दीप कार्कीले बिट भइसकेको अवस्थामा सेड्रिक अबालाई पेनाल्टी क्षेत्रभित्र लडाएपछि रेफ्रीले संकटालाई पेनाल्टी दिएका थिए । अमित तामाङले पेनाल्टीमा सहजै गोल गर्दै संकटाको जित पक्का गरे ।

अंक तालिका :