काठमाडौं (हाम्रो खेलकुद) – डिफेन्डिङ च्याम्पियन नेपाल एपीएफ क्लब प्रधान सेनापति छैटौं अन्तर्राष्ट्रिय महिला फुटबल प्रतियोगिता २०७५ को फाइनलमा प्रवेश गरेको छ । सोमबार भएको सेमिफाइनलमा एपीएफले पुलिसलाई ३-० ले पराजित गरेको हो ।

भद्रकालीस्थित सेनाको मुख्यालयमा भएको खेलमा एपीएफका लागि सावित्रा भण्डारीले २ तथा प्लेयर अफ द म्याच अनिता बस्नेतले एक गोल गरिन् । एपीएफले पहिलो हाफको ‌३५ अौं मिनेटमा अग्रता लिएको थियो । सावित्रा भण्डारीले अनिता बस्नेतको पासलाई सदुपयोग गर्दै गोल गरेकी थिइन् ।

दोस्रो हाफमा एपीएफले दुई गोल थप्यो । अनिता बस्नेतले ६९ अौं मिनेटमा पेनाल्टी क्षेत्रको ठिक बाहिरबाट उत्कृष्ट गोल गरिन् । त्यसको एक मिनेटमै एपीएफले पेनाल्टी पायो । मोनिका पुलामी मगरले गोललाइन नजिक ह्यान्ड गरेपछि रेफ्री पदम भुजेलले सिधै रातो कार्ड देखाएका थिए । सावित्राले पेनाल्टीमा सहजै गोल गर्दै एपीएफको जित पक्का गरिन् ।

खेलपछि एपीएफका प्रशिक्षक जनक सिंहले जित दर्ता गरेपनि सोच अनुरुप प्रदर्शन नभएको बताए । ‘ हामीले धेरै गोल गर्ने अवसर खेर फाल्यौं । अग्रपंक्तिमा अझै समस्या देखिन्छ ‌। फाइनलमा त्यसलाई सुधार्दै उपाधि रक्षा गर्ने लक्ष्य राखेका छौं, ‘ उनले भने ।

एपीएफले फाइनलमा प्रदेश २ र अार्मी बीचको विजेतासँग फाइनल खेल्नेछ । उपाधि भिडन्त बुधबार हुनेछ ।