एजेन्सी – स्पेनिस कोपा डेल रे फुटबलको सेमिफाइनलमा दुई चिर प्रतिद्धन्द्धी क्याटलान क्लब बार्सिलोना र स्पेनिस महारथी रियल मड्रिडबीच प्रतिस्पर्धा हुने भएको छ ।
स्पेनिस कोपा डेल रेले शुक्रबार सार्वजनिक गरेको ‘ड्र’ अनुसार बार्सिलोना र रियलबीच (एल क्लासिको) सेमिफाइनलमै हुने भएको हो । अर्काे सेमिफाइनलमा रियल बेटिस र भ्यालेन्सियाबीच खेल हुनेछ ।
बार्सिलोना यसअघिको लगातार चारपटकको च्याम्पियन हो । रियलले २०१३–१४ को सिजनमा बार्सिलोनालाई पराजित गर्दै उपाधि जितेको थियो । सेमिफाइनलको पहिलो लेग बार्सिलोनाको घरेलु मैदानमा ७ फेब्रुअरीमा हुनेछ । दोस्रो लेग रियलको मैदानमा २८ फेब्रुअरीमा हुनेछ । फाइनल खेल २६ मे मा हुनेछ ।
यो सिजन बार्सिलोना र रियल तीनपटक आमने–सामने भएका छन् । दुई खेलमा बार्सिलोनाले जित हात पार्दा एक खेल बराबरीमा रोकिएको छ ।
