नेपालगन्ज (हाम्रो खेलकुद) – आठौं राष्ट्रिय खेलकुदको फुटबलको स्वर्ण पदकका लागि त्रिभुवन आर्मी क्लबले अर्को विभागिय टोली नेपाल पुलिस क्लबको सामना गर्ने भएको छ ।
नेपालगन्ज रंगशालामा मंगलबार साझ भएको दोस्रो सेमिफाइनलमा अर्को विभागिय टोली नेपाल एपिएफ क्लबलाई २–१ ले हराउँदै पुलिस अन्तिम दुईमा पुगेको छ । आज बिहान भएको खेलमा प्रदेश ५ लाई टाइब्रेकरमा ३–१ ले हराउँदै आर्मी फाइनलमा पुगेको थियो ।
फाइनल बधबार आठौंको समापनअघि हुनेछ । पुरुष भलिबलमा पनि आर्मी र पुलिसबीच नै प्रतिस्पर्धा हुनेछ । पुलिसलाई फाइनलमा पुर्याउनका लागि रवि पासवान र तेज तामाङले गोल गरे । एपिएफका लागि आशिष लामाले गोल गरेका थिए ।
रविको गोलमा पुलिसले नवौं मिनेटमा खेलमा अग्रता लिएको थियो । तेजले ३४ औं मिनेटमा गोल गर्दै अग्रतालाई दोब्बर पारेका थिए । खेल सकिन १८ मिनेट बाँकी रहँदा एपिएफका आशिषले फर्काएको गोल सात्वना मात्र रहन सक्यो ।
