एजेन्सी – विश्वकीर्तिमानी सुपरस्टार फरवार्ड नेयमारले क्लब छाड्ने चर्चा चलिरहँदा फ्रेन्च लिग वान च्याम्पियन पेरिस सेन्ट जर्मेन (पीएसजी) ले इंग्लिस क्लब क्रिस्टल प्यालेसका फरवार्ड विल्फ्रिड जाहालाई क्लबमा अनुबन्ध गर्ने तयारी थालेको छ ।

पीएसजीले जाहा अनुबन्ध गर्नको लागि आफ्ना प्रतिनिधिलाई लण्डन पठाएको डेलीमेलमा उल्लेख छ । आइभोरी कोस्टका २६ वर्षे जाहाको लागि क्लबले १०० मिलियन पाउण्ड खर्चने उल्लेख छ । समर ट्रान्सफर विन्डो सकिन एक साता बाँकी रहदा पीएसजीले जाहा अनुबन्धको तयारी गरेको हो । जाहाले गतवर्ष नै प्यालेसमा ५ वर्षको सम्झौता गरेका थिए । जाहालाई अनुबन्ध गर्न इंग्लिस टोली आर्सनल र एभर्टनले पनि चासो देखाएपनि अनुबन्ध गर्न सफल भएन ।

पीएसजीले नेयमार गुमाए युभेन्टसका पाउलो डिब्यालालाई अनुबन्ध गर्न सक्नेछ । जसका लागि युभेन्टसले टोटेनहमका क्रिस्टियन इरिक्सनलाई क्लबमा अनुबन्ध गर्नुपर्ने हुन्छ । डिब्यालाको अनुबन्धले जाहाको अनुबन्धमा केही असर नपर्ने क्लबले उल्लेख गरेको छ ।

ब्राजिलियन फरवार्ड नेयमार अनुबन्धको लागि पछिल्लो समय स्पेनका दुई क्लब बार्सिलोना र रियाल म्याड्रिड लागिपरेका छन् । नेयमारको उचित मुल्य नपाएको भन्दै पीएसजीले दुवै टोलीको प्रस्तावलाई अस्वीकार गरिरहेको छ ।