ललितपुर (हाम्रो खेलकुद)– घरेलु फुटबलको सफल क्लबमध्येको एक रुस्लान थ्री स्टार क्लबको अध्यक्षमा अरुणमान जोशी निर्विरोध निर्वाचित भएका छन् । यसअघि जोशी कार्यवहाक अध्यक्ष थिए ।

क्लबको आइतबार बसेको वार्षिक साधारण सभाले जोशीको अध्यक्षतामा सबै १९ सदस्यीय कार्यसमिति निर्विरोध चयन गरेको हो । तीन वर्षे कार्यकालका लागि दुई सदस्य पछि चयन गर्ने गरि पुर्ण गरिने क्लबले जनाइएको छ ।

नि–र्वतमान अध्यक्षमा ज्ञान बहादुर शाक्य छन् । उपाध्यक्षमा निर्मल रत्न शाक्य, अतिश कृष्ण श्रेष्ठ, रमेश अवाले, कृष्ण अवाले, बिरेन्द्रलाल श्रेष्ठ र जय कृष्ण श्रेष्ठ चयन भए । महासचिवमा सन्जिव शिल्पकारले निरन्तरता पाए ।

कोषाध्यक्षमा राम श्रेष्ठ ‘बोस’,सचिवमा कुल बहादुर महर्जन, निवास गोपाल वैद्य र सह–कोषाध्यक्ष देवेन्द्र लाल श्रेष्ठ चुनिए । सदस्यहरुमा राम कृष्ण चित्रकार, प्रेम बहादुर चित्रकार, हरि महर्जन, रामेश्वर अवाले, रुपेन्द्र पुरी र मुकेश नकर्मी निर्विोध निर्वाचित बने ।

ललितपुर महानगरपालिकाका मेयर चिरी बाबू महर्जनले थ्री स्टार सँगै ललितपुरका अन्य क्लबहरुलाई खेल क्षेत्रमा अग्रसर हुनका लागि नगरपालिकाले भरपुर सहयोग गर्ने र क्लबको लागि आवश्यक पुर्वाधारहरु मैदान लगायतको सहयोग गर्ने प्रतिबद्धता व्यक्त गरे ।

अखिल नेपाल फुटबल संघ (एन्फा) का अध्यक्ष कर्मा छिरिङ शेर्पाले थ्री स्टारको हाल सम्मको उपलब्धिको प्रसंशा गर्दै नेपाली फुटबलको बिकासमा क्लबसँग हातेमालो गरि अगाडि बढ्ने बताए ।