काठमाडौं (हाम्रो खेलकुद)– नेपाली टोली भुटानमा जारी महिला साफ यू १५ च्याम्पियनसिपबाट लगभग बाहिरिएको छ । थिम्पुस्थित चाङलिमिथाङ रंगशालामा नेपाली टोली बंगलादेशसँग २–१ ले पराजित भएको छ । च्याम्पियनसिपमा नेपालको यो लगातार दोस्रो हार हो । भारत र भुटानको खेलको नतिजा नेपालले अघिल्लो चरणको यात्राको निर्भर रहन्छ ।

त्यो खेलमा भुटान पराजित भए वा बराबरीमा रोकिए नेपाल बाहिरिनेछ । भुटान जितेको खण्डमा भने नेपालको पनि अघिल्लो चरण जाने गणितिय सम्भावना बाँकी रहन्छ । सो खेलमा भुटान पराजित भए वा बराबरीमा खेल टुंगिए अन्तिम दुई खेलअघि नै भारत र बंगलादेश फाइनल पुग्नेछन् ।

यू १५ महिला च्याम्पियनसिपमा नेपालले अहिले सम्म बंगलादेशलाई हराउन सकेको छैन । पूर्व विजेता बंगलादेशका लागि ११ औं मिनेटमा साहेदा अख्तरले गोल गर्दै अग्रता दिलाएकी थिइन् । समसुन्नहार ले पनोल्टीमा गोल गरिन् । ६४ औं मिनेटमा अमिषा कार्कीले गोल गर्दै नेपालका लागि अन्तर घटाइन् । तर त्यसपछि गोल हुन सकेन ।

राउन्ड रोविन लिगको अन्तिम खेलमा नेपालले आइतबार भुटानको सामना गर्नेछ । नेपाली टोली पहिलो खेलमा भारतसँग ४–१ ले पराजित भएको थियो । अघिल्ला दुवै संस्करणमा नेपाल बंगलादेशसँग पराजित भएको थियो । दुई वर्षअघि भएको पहिलो संस्करणको विजेता बंगलादेश गत वर्ष उपविजेता बनेको थियो ।

नेपाली टोलीका प्रशिक्षक राकेश श्रेष्ठले अवसर सदुपयोग गर्न नसक्नुनै हारको कारण रहेको बताए । खेलाडीले शतप्रतिशत दिएर खेले । पहिलो हाफ सोचे जस्तो भएन , राष्ट्रिय फुटबल टोलीका पूर्व कप्तान श्रेष्ठले भने, दोस्रो हाफमा खेला फर्कियौं । एक गोल भयो पनि अर्को गोल गर्न सकेनौं । पहिलो खेलपछि हामी अलि आत्तिए जस्तो भयौं । अब अन्तिम खेलमा राम्रो खेल्ने प्रयास गर्नेछौं ।