काठमाडौं (हाम्रो खेलकुद)– विना जित नेपाली टोली भुटानमा जारी साफ यू १५ महिला साफ च्याम्पियनसिपको यात्रा अन्त्य गरेको छ । सुरुवाती दुई खेल गुमाउँदै च्याम्पियनसिपबाट बाहिरिएको नेपालले राउन्ड रोविनको अन्तिम खेलमा आयोजक भुटानको सामना गरेको थियो ।

आइतबार भएको अन्तिम खेलमा अग्रता जोगाउन नसक्दा नेपालले भुटानसँग १–१ को बराबरी खेलेको थियो । गोलरहित बराबरीमा पहिलो हाफ टुंगिएको थियो । दोस्रो हाफको पाँचौं मिनेटमा नेपालले निकिता थोकरको गोलबाट अग्रता लिएको थियो ।

तर, त्यो अग्रता लामो समय टिकेन । भुटानका लागि ६७ औं मिनेटमा कप्तान डेकी इहाजोमले बराबरी गोल फर्काइन् । समान १ अंक जोडेका नेपाल तेस्रो र भुटान चौथो स्थानमा रहँदै प्रतियोगिताको अन्त्य गरे ।

च्याम्पियनसिपको पहिलो खेलमा भारतसँग ४–१ ले पराजित भएको नेपालले बंगलादेशलाई २–१ ले नतिजा सुम्पेको थियो । अन्तिम खेल अघि भारत र बंगलादेश सेमिफाइनल पुगिसकेका थिए भने नेपाल र भुटान च्याम्पियनसिपबाट बाहिरिएका थिए । आजै भएको पहिलो खेलमा भारत र बंगलादेशले १–१ को बराबरी खेलेका थिए । अब यी दुई टोलीबीच मंगलबार फाइनल हुनेछ ।

महिला यू १५ साफ च्याम्पियनसिपमा लगातार तेस्रो संस्करणमा नेपाल कमजोर प्रदर्शन गर्दै फर्कने भएको छ । बंगलादेशमा दुई वर्षअघि ४ देशको सहभागितामा पुछारमा रहेको थियो । त्यस्त गत वर्ष ४ देशको सहभागितामा भएको च्याम्पिनसिपमा पनि नेपाल चौथो भएको थियो ।