विनोदबाबु रिजाल, भरतपुर
चितवनमा सबैभन्दा धेरै पुरस्कार राशीको राष्ट्रिय नकआउट फूटबल प्रतियोगिता टुबोर्ग जेसीज विकास रनिङ शिल्डको सबै तयारी सकिएको छ ।

आयोजक नारायणगढ जेसीजले खेल मैदानमा आयोजना गरेको पत्रकार सम्मेलनमा दिइएको जानकारीअनुसार मैदान, प्याराफिटलगायत सबै काम सम्पन्न भएको छ । नारायणगढ जेसीजका अध्यक्ष विकासमान श्रेष्ठले निकै नै मेहनत गरेर मैदान सम्याइएको जानकारी दिए ।

नारायणगढको क्याम्पाचौरमा असोज ३० गतेदेखि हुने प्रतियोगितामा सहभागी हुने टिमलाई दुई समूहमा विभाजन गरिएका छन् ।जेसीज विकास रनिङ शिल्ड फुटबल प्रतियोगिता हुदैछ । आयोजक नारायणगढ जेसीजले आज पत्रकार सम्मेलन गरि प्रतियोगिताको तयारी पूरा भएको जनाएको छ ।

सशस्त्र प्रहरी बलको एपीएफ क्लब, चितवन ११, मकवानपुर ११, झापा ११ र नेपाल आर्मी क्लब समूह ‘ए’ मा छन् भने समूह ‘बी’ मा नेपाल पुलिस क्लब, सरस्वती युवा क्लब, युनाइटेड दार्जिलिङ, जावलाखेल युथ क्लब र संकटा क्लब रहेको प्रतियोगिता संयोजक कपिल श्रेष्ठले जानकारी दिए ।

मैदानको पश्चिमतर्फ बनाइएको अस्थायी प्याराफिटमा करिब एक हजार आठ सय दर्शक अटाउने दावी आयोजकको छ । कात्तिक ९ गतेसम्म हुने प्रतियोगितामा विजयी हुनेले ६ लाख ६ हजार ६ सय ६६ रुपैयाँ, शिल्ड तथा उपविजेताले ३ लाख ३ हजार तीन सय ३३ रुपैयाँ पुरस्कार पाउने छ ।

प्रतियोगिताको क्वाटरफाइनलसम्म अवलोकनका लागि एक सय र दुई सय रुपैयाँको टिकट तथा सेमीफाइनल र फाइनल अवलोकनका लागि दुई सय र तीन सय रुपैयाँको टिकटको व्यवस्था गरिएको प्रचारप्रसार संयोजक सूर्यभक्त अधिकारीले जानकारी दिए ।