काठमाडौं (हाम्रो खेलकुद)– राजुकाजी शाक्य नेपाली फुटबलमा लामो इतिहास बोकेको क्लबमध्येको एक क्लब न्यूरोड टिम (एनआरटी) को प्रशिक्षकमा आधिकारिक रुपमा नियुक्त भएको छ ।

क्लबले शुक्रबार शाक्यलाई १ वर्षको लागि मुख्य प्रशिक्षकको रुपमा नियुक्त गरेको हो । उनी आफ्नै पुर्व क्लबमा प्रशिक्षकका रुपमा फर्किएका हुन् । शाक्यले एनआरटीबाट खेल्नुका साथै प्रशिक्षण पनि सम्हालेका छन् ।

‘एनआरटी मेरो परिवार हो । १० वर्षभन्दा लामो समय एनआरटीलाई प्रशिक्षण दिइसकेको छु,’ प्रशिक्षक शाक्यले भने, ‘बीचमा केहि समय अन्य क्लबमा गए । अब फेरि एनआरटी फर्किएको छु । खुसी लागेको छ ।’ शाक्यले अघिल्लो सिजन ‘ए’ डिभिजनमा नवप्रवेशी भ्याली च्यासल युथ क्लबलाई प्रशिक्षक दिएका थिए ।

जुनियर युवा खेलाडीको बाहुल्यता रहेको एनआरटीलाई लिगमा राम्रो नतिजा दिने प्रयास गरिने प्रशिक्षक शाक्यले बताए । ‘म क्लबमा आधिकारिक रुपमा आजबाट नियुक्त भएको छु । क्लबले यसअघि पनि राम्रा खेलाडीहरु अनुबन्ध गरिसकेको छ ।’ प्रशिक्षक शाक्यले भने, ‘केही नयाँ खेलाडी पक्कै थपिनेछ । मुख्य गरी लिगमा राम्रो नतिजा दिने हाम्रो प्रयास हुनेछ ।’ क्लबले यसअघि लिग च्याम्पियन सिग्नेचर मनाङ–मस्र्याङ्दी क्लबका प्रकाश बुढाथोकीलाई अनुबन्ध गरेको थियो ।

च्यासलका व्यवस्थापक शंकर व्यन्जनकार र प्रशिक्षक राजुकाजी शाक्य

प्रशिक्षणका हिसाबले शाक्य नेपाली प्रशिक्षकमा उत्कृष्ट मध्येका मानिन्छन् । यद्दपी उनले कुनै क्लबलाई लिग जिताउन सकेका छैनन् । खेल जीवनमा देशका लागि स्वर्ण पदक दिलाउन नेपाली टोलीको कप्तानी गरेको शाक्यले नेपाललाई अर्को स्वर्ण पदक दिलाउने समयमा प्रशिक्षकको भूमिका निर्वाह गरेका थिए ।

सन् १९९३ मा नेपालले तत्कालिन दक्षिण एसियाली महासंघिय खेलकुद (साफ) हालको दक्षिण एसियाली खेलकुद (साग) मा स्वर्ण पदक जित्दा शाक्य टोलीको कप्तान थिए । त्यहि सागको १२ औं संस्करणमा नेपालले स्वर्ण पदक जित्न शाक्य प्रशिक्षक थिए । यद्दपी, उनी कप्तान हुँदा नेपालको सिनियर टोलीले खेल्थ्यो भने सागको नवौं संस्करणपछि यू २३ टोलीबीच प्रतिस्पर्धा भएको थियो । देशका लागि सफलता दिलाइसकेका शाक्यले क्लबलाई भने सोचे अनुरुपको सफलता दिलाउन सकेका छैनन् ।

शाक्यले एनआरटीपछि विभागीय त्रिभुवन आर्मी क्लबसँगै मच्छिन्द्र क्लब, सिएमजी क्लब संकटा, सिग्नेचर मनाङ–मस्र्याङ्दी क्लब र भ्याली च्यासल युथ क्लबलाई प्रशिक्षण दिइसकेका छन् ।