काठमाडौं (हाम्रो खेलकुद)– नेपाल राष्ट्रिय तथा अन्तर्राष्ट्रिय खेलाडी (एनएनआइपिए) युेक च्याप्टरले लामो समयदेखि पक्षघातबाट पीडित राष्ट्रिय फुटबल टोलीका पूर्व खेलाडी वाइबी घलेलाई आर्थिक सहयोग गरेको छ ।

एनएनआइपिए युके च्याप्टरका अध्यक्ष सिद्धार्थविक्रम क्षेत्रीले घलेलाई २ लाख रुपैयाँ हस्तान्तरण गरे । एनएनआइपिएले यसअघि पनि दक्षिण एसियाली खेलकुद (साग) का पदक विजेता, कृष्णमान मानन्धर, इन्द्ररानमगर, एसियाली खेलकुदका पदक विजेता दीपक महर्जन, बक्सिङ खेलाडी मन्जुजंग शाही लगायतलाई सहयोग गरेको थियो ।

त्यस्तै २०७२ वैशाखको विनाशकारी भूकम्पका पीडितलाई पनि क्षेत्रीको पहलमा सहयोग गरिएको थियो । घले तीनै खेलाडी हुन् जसले सन् १९८२ को एसियाली खेलकुदमा कुवेतविरुद्ध गोल गरेका थिए । त्यो नेपालको पहिलो अन्तर्राष्ट्रिय गोल थियो। ३७ वर्षयता कुवेतविरुद्ध अर्को कुनै खेलाडीले पनि गोल गर्न सकेको छैन । पहिलो सागका स्वर्ण पदक विजेता टोलीका मुख्य सदस्य समेत रहेका घलेले ८ वर्ष (१९८२ देखि १९९० ) राष्ट्रिय टोलीमा बिताएका थिए ।

एन्फाका पूर्व केन्द्रिय सदस्य एवंम एन्फा एकेडेमीका पूर्व निर्देशक समेत रहेका ६१ वर्षे घलेले खेल जीवनमा आरसिटी, फ्रेन्ड्स क्लब, शाही नेपाल वायुसेवा निगम, महेन्द्र पुलिस क्लबबाट खेलेका थिए । ११ वर्षदेखि प्यारालाइसिसबाट पीडित घलेको चार महिनाअघि गल ब्लाडर र स्टोनको शल्यक्रिया भएको थियो ।

देशलाई चिनाउने खेलाडीलाई सरकार र खेल निकायले सहयोग गर्नुपर्नेमा एनएनआइपिए युके च्याप्टरका अध्यक्ष क्षेत्रीले जोड दिए । उनले बेलायतमा जाने खेलाडीलाई आफुहरुले सक्दो सहयोग गर्ने गरेको पनि उनले बताए । क्षेत्रीले खेलाडीलाई सम्मान गर्न सके मात्र नयाँ पुस्तामा खेल क्षेत्रमा लाग्न प्रेरणा मिल्नेमा जोड दिए ।

एनएनआइपिएका अध्यक्ष दीपक श्रेष्ठले युके च्याप्टरको खेलाडीहरुलाई पुर्याउँदै आएको सहयोगका लागि धन्यवाद दिए । उनले राष्ट्रिय खेलकुद परिषद् (राखेप) ले खेलाडी कल्याण कोष स्थापना गरि त्यसमा १ करोड ४० लाख रुपैयाँ जम्मा भएको उल्लेख गर्दै पूर्व खेलाडी घलेलाई पनि सहयोगका लागि प्रक्रिया अघि बढाउने सकिने बताए ।

नेपाली फुटबल टोलीका पूर्व कप्तान राजुकाजी शाक्यले घलेलाई सहयोग गर्न राखेप र अखिल नेपाल फुटबल संघ –एन्फा) निवदेन दिइएको जानकारी गराए । तर, उनले खेलाडीले यसरी आर्थिक सहयोग मान्नुपर्दा दुःखा लाग्ने उल्लेख गर्दै भने, सरकारले नै खेलाडीका लागि उपचारको ग्यारेन्टी गरिदिएको खण्डमा हात फैलाउनु पर्ने अवस्था आउने थिए ।

नेपाल बक्सिङका पूर्व अध्यक्ष राजीव श्रेष्ठले एनएनआइपिएको युके च्याप्टरले अप्ठ्यारोमा परेका खेलाडीलाई सधै सहयोग गर्दै आएकोमा अध्यक्ष खत्रीलागयत बेलायतमा बस्दै आएका पूर्व खेलाडीलाई धन्यवाद दिए । एन्फाका उपाध्यक्ष उपेन्द्रमान सिंहले खेलाडीहरुको विमा र कल्याण कोष स्थापनाका लागि एन्फा प्रयासरत रहेको उल्लेख गर्दै भने, घले दाईलाई के सहयोग गर्न सकिन्छ त्यसमा एन्फाले अवश्यक निर्णय लिनेछ ।