विनोदबाबु रिजाल, भरतपुर

टुबोर्ग जेसीज विकास रनिङ शिल्ड राष्ट्रिय फुटबल प्रतियोगिताको उपाधिको छिनोफानो शनिबार हुँदैछ । नारायणगढको क्याम्पाचौरमा हुने फाइनलमा ‘ए’ डिभिजनको बलियो क्लबमध्येको एक नेपाल पुलिसले घरेलु टोली चितवन–११ को सामना गर्दैछ ।

अर्को विभागिय टोली त्रिभुवन आर्मी क्लबलाई पराजित गर्दै चितवनले फाइनलको यात्रा तय गरेको थियो । त्यस्तै पुलिसले सेमिफाइनलमा ए डिभिजन क्लबको प्रतिद्वन्द्वि सिएमजी क्लब संकटाको चुनौतिलाई पार गरेको थियो ।

दुवै टोलीले क्याम्पाचौरमा इतिहास रच्ने दाबी गरेका छन् । चितवन–११ का लागि यो स्तरको फाइनल पहिलो हो । त्यसकारण पनि टोली ज्यादा उत्साहित छ । चितवनका प्रशिक्षक विजय घले घरेलु मैदानमा ठूलो प्रतियोगिता जित्न कुनै कसर बाँकी नराख्ने बताउँछन् ।

पुलिसलाई पनि क्याम्पाचौरमा उपाधि उचालेको अनुभव कमै छ । पुलिसका प्रशिक्षक अनन्तराज थापाले दुई दशकअघि खेलाडीका रुपमा विकास रनिङ शिल्ड उचालेको इतिहास प्रशिक्षकका रुपमा दोहो¥याउने लक्ष्यमा छन् । अनन्तराज थापा सम्मलित धरान फुटबल क्लबले २०५५ मा विकास रनिङ शिल्ड उपाधि जितेको थियो ।

शुक्रबार क्याम्पाचौरमा आयोजित प्रि–म्याच कन्फ्रेन्समा दुवै प्रशिक्षकले एकअर्कार्ला कमजोर नकाक्ने बताए । विपक्षीको कमजोरीको फाइदा उठाउने कोशिस गर्ने उनीहरुको भनाई थियो ।

आयोजक नारायणगढ जेसीजका अध्यक्ष विकासमान श्रेष्ठले फाइनल प्रतिस्पर्धात्मक हुने आशा व्यक्त गरे । दर्शकहरुलाई फाइनल हेर्न आउन आग्रह गरेका अध्यक्ष श्रेष्ठले अहिलेसम्मको अवस्था हेर्दा प्रतियोगिता सफल भएको दाबी गरे ।

चितवन जिल्ला फुटबल संघ सहआयोजक रहेको प्रतियोगिता विजेताले उपाधिसहित ६ लाख ६ हजार ६ सय ६६ रुपैयाँ र दास्रो टोलीले ३ लाख ३ हजार ३ सय ३३ रुपैयाँ पुरस्कार पाउने छ ।