काठमाडौं (हाम्रो खेलकुद)– दशरथ रंगशालाको पूर्ननिर्माण खेलप्रमीको अहिलेको मुख्य चासोको विषय रहेको छ । कारण त्यहाँ अर्को महिना त्यहाँ दुई महत्वपूर्ण प्रतियोगिता आयोजना हुँदैछ ।
मंसिर १५ देखि २३ गते सम्म आयोजना हुने १३ औं दक्षिण एसियाली खेलकुद (साग) को मुख्य आयोजना थलो रंगशालानै हो । सागको उद्घाटन र समापन त्यहि हुनेछ ।
सन् १९८४ को पहिलो र १९९९ को आठौं संस्करणको आयोजना पनि सोही रंगशालामा भएको थियो । साग अघि रंगशालामा नेपाल र कुवेतबीच विश्व कप छनोटको समूह चरणको खेल हुनेछ ।
२०७२ वैशाख १२ र २९ को विनाशकारी भूकम्पबाट क्षेति पुगेपछि रंगशाला प्रयोग गरिएको छैन । सोही वर्षको फागुनमा नेपालले १३ औं साग आयोजनाको जिम्मेवारी पाएपनि रंगशाला पूर्न निर्माणको काम भने सुस्त गतिमा भएको थियो ।
रंगशालाको पूर्ननिर्माणको काम भने अझै सकिएको छैन । निर्धारित मितिमा हुने भएको खण्डमा आजको ठिक एक महिनामा सागको उद्घाटन हुनेछ । पूर्न निर्माण सकिनेमा भने अहिले पनि ढुक्क हुने अवस्था छैन । भिआइपी प्यारापिटतर्फ छाना र सिट हाल्ने काम सुरु भएको छैन ।
साधारण प्यारापिटतर्फ भने पहिले नै छाना राखिसकिएको छ । सिट राख्ने काम बिहीबारबाट सुरु भएको छ । बिहीबार र शुक्रबार गरि २ हजार भन्दा बढी सिट जडान भएको फिल्ड इन्जिनियर अमर शाहले हाम्रो खेलकुदलाई जानकारी दिए ।
उनका अनुसार दिनको १ हजार देखि १ हजार २ सय सम्म सिट जडान गर्ने लक्ष्य राखिएको छ । साधारण प्यारापिटतर्फ १२ हजार भन्दा कहि बढी सिट राखिने बताइएको छ । ‘१५ जना कामदार खटिएका छन्,’ उनले भने,‘ साधारणतर्फको सिट हामी १० देखि १२ दिन भित्रमा राखिसक्नेछौं ।’
भिआइपिएतर्फ भने ३ हजार सिट राखिने भएको छ । चार रंगका सिट रंगशालामा विछइने बताइएको छ । ‘साधारण र भिआइपी दुवैतर्फ रातो, निलो, हरियो र पहेलो गरि चार रंगका कुर्सी राखिनेछ,’ इन्जिनियर शाहले भने,‘ विश्व कप छनोट र सागलाई नै लक्षित गरेर हामीले काम अघि बढाइरहेका छौं । विश्व कप अघि साधारणतर्फका सिटको काम सकिनेछ ।’
साधारणतर्फ राखिने कुर्सी मध्ये ८ हजार कुर्सी आइसकेको र बाँकी केहि दिनमा आउने पनि उनले जानकारी दिए । कुर्सीको कामसँगै साधारण प्यारापिटतर्फ पर्खाल रंगाउने काम पनि सुरु भएको छ । त्यस्तै मैदानको काम पनि सँगसँगै अघि बढिरहेको छ ।
विश्व कप छनोटमा नेपालले ४ खेल खेलिकसको छ । भदौमा कुवेत र चाइनिज ताइपेसँग खेलेको नेपालले असोजमा अष्ट्रेलिया र जोर्डनसँग खेलेको थियो । त्यसमध्ये एक मात्र जित नेपालले चाइनिज ताइपेविरुद्ध निकालेको थियो ।
जसमा अन्जन विष्टको दुवै गोलमा नेपाल २–० ले विजयी भएको थियो । बाँकी ३ खेलमा नेपालले १५ गोल खायो र गोल गर्न सकेन । नेपालले कुवेतसँग ७–०, अष्ट्रेलियासँग ५–० र जोर्डनसँग ३–० को हार बेहोरेको थियो ।
