एजेन्सी – बोरुसिया मोन्चेनग्लाडवाचले जर्मन बुन्डेस लिगामा चार अंकको स्पष्ट अग्रता लिएको छ । वेर्डर ब्रेमेनमाथि ३–१ को जित निकाल्दै मोन्चेनग्लाडवाचले ४ अंकको अग्रता लिन सफल भएको हो ।

यो सिजन उच्च प्रदर्शन गरिरहेको मोन्चेनग्लाडवाचले ११ खेलबाट २५ अंक जोडेको छ । बोरुसियाले ११ खेलमा ८ जित, १ बराबरी र २ हार बेहोरेको छ । दोस्रो स्थानको आरवी लेइप्लिजको २१ अंक छ । बायर्न म्युनिख, फ्रेइवर्गको पनि समान २१ अंक छ ।

मोन्चेनग्लाडवाचको जितमा प्याट्रिक हेर्मनले दुई तथा रामी बेन्सेबैनीले एक गोल गरे । वेर्डर ब्रेमेनका लियोनार्दाेले एक गोल फर्काए ।
२०औं मिनेटमा रामीले गोलमा बोरुसियाले खेलमा अग्रता बनाएको थियो । त्यसको दुई मिनेटपछि नै प्याट्रिकले गोल गर्दै अग्रता दोब्बर बनायो । ५३औं मिनेटमा ब्रेमेनका डेभी क्लासिमले पेनाल्टीमा गोल गर्न सकेनन् ।

५९औं मिनेटमा प्याट्रिकले व्यक्तिगत दोस्रो तथा टिमका लागि तेस्रो गोल गरेपछि मोन्चेनग्लाडवाचले खेलमा ३–० को आरामदायी अग्रता लियो । ८७औं मिनेटमा घरेलु टोली १० खेलाडीमा समेटियो । रामी बेन्सेबैनी दोहोरो पहेलो कार्ड खादै मैदानबाट बाहिरिए । इन्ज्युरी समयको थप गरिएको तेस्रो मिनेटमा लियोनार्दाेले गोल गरेपनि हार टार्न सकेन । ब्रेमेन ११अंकसहित १४औं स्थानमा छ ।