काठमाडौं (हाम्रो खेलकुद)– रुस्लान थ्री स्टार क्लब पुनः विजयी लयमा फर्केपछि कतार एयरवेज सहिद स्मारक ए डिभिजन लिगमा रोमाञ्चकता थपिएको छ । दशरथ रंगशालामा महत्वपूर्ण जित हासिल गर्ने क्रममा बुधबार थ्री स्टारले अर्को ललितपुरे टोली ब्रिगेड ब्वाइज क्लब (बिबिसी) लाई ३–१ ले हराएको छ । ५ खेलमा थ्री स्टारको खातामा १० अंक पुगेको छ । शीर्षस्थानको मनाङको ११ र मछिन्द्रको १० अंक छ ।

उपाधि दाबेदारका रुपमा हेरिएका मनाङ मस्र्याङ्दी क्लब र मछिन्द्र क्लबले २–२ को बराबरी खेलेको दोस्रो दिन थ्री स्टारले निकाल्दै उपाधि दौडलाई रोचक बनाएको छ । बराबरीका साथ लिगको सुरुवात गरेको थ्री स्टारले त्यसपछिका दुई खेल लगातार जितेको थियो । यसअघिको खेलमा भने टोली त्रिभुवन आर्मी क्बलसँग २–० ले स्तब्ध भएको थियो ।

थ्री स्टारको जितमा सुसान श्रेष्ठ, अनन्त तामाङ र हम्जातले गोल गरेका थिए । १४ औं मिनेटमा सुसानको गोलमा थ्री स्टारले अग्रता लिएको थियो । अशोक खवासको पासमा सुसानले सिक्स यार्ड बक्स भित्रबाट सहज गोल गरेका थिए । ४१ औं मिनेटमा अनन्तले गोल थपे । मिक्छेन तामाङको कर्नरमा अनन्तले हेडमार्फत गोल गरेका थिए ।

दोस्रो हाफ सुरु भएको केहि मिनेटमै थ्री स्टारले अर्को गोल थपेको थियो । ५८ औं मिनेटमा हम्जातले गोल गरेपछि थ्री स्टारको अग्रता ३–० बनेको थियो । गोलरक्षक अघि बढेको अवस्थामा हम्जातको चिप गमेलमा परिणत भएको थियो ।

त्यसबाहेक पनि थ्री स्टारले खेलमा थप गोलको अवसर पाएको थियो । आठौ मिनेटमा थ्री स्टारका मिक्छेनको कर्नरमा दिपेश घलेले उपलब्ध गराएको क्रसमा कप्तान विक्रम लामाको हेडर पोष्ट नजिकबाट बाहिरियो । लगत्तै नवौं मिनेटमा सुसानले गोलरक्षक अघि बढेको अवस्थामा वान भर्सेस वानमा गोलरक्षक विशाल सुनारलाई बिट गर्दै गरेको चिप प्रहारलाई बीबीसीका डिफेन्डर मनोज राईले गोललाईनबाट बचाउदा थ्री स्टार अग्रता लिनबाट चुक्यो ।

२८औं मिनेटमा दिपेशले गोल गर्ने सुन्दर मौका गुमाए । हम्जातको पासलाई नियन्त्रणमा लिदै गरेको प्रहारलाई गोलरक्षक विशालले बचाएपनि दोस्रो प्रयास आकासियो । २९औं मिनेटमा पदम भट्टराईको प्रहार पोस्टबाट थोरै बाहिरिदा बिबिसी बराबरीबाट चुक्यो ।

५०औं मिनेटमा हम्जातले गोल गर्ने मौका खेल फाले । उनको प्रहार गोलरक्षकले बचाए । रिवाउन्डमा सुसानको प्रहार बचाए । लगत्तै सुसानको फितलो प्रहार गोलरक्षकले सहजै बचाए । ६६औं मिनेटमा बीबीसी १० खेलाडीमा समेटियो । बिबिसीका दिपक राज सिंहले थ्री स्टारका अशोक खवासलाई फल गरेपछि सिधै रातो कार्ड खाँदै मैदानबाट बाहिरिए ।

७२औं मिनेटमा रोशन थापामगरको प्रहारलाई थ्री स्टारका गोलरक्षक प्रिसोले सहजै बचाए । ७७ औं मिनेटमा उत्तम गुरुङको प्रहारलाई गोलरक्षक प्रिसोले सहजै बचाए । ८१ औं मिनेटमा विजय भुजेल चुके । लगत्तै सुशील राईको प्रहार दोस्रो बारबाट थोरै बाहिरियो ।

८७औं मिनेटमा शिव सुवेदीको क्रसमा सुशील राईले मिलाईदिएको पासमा मिक्छेन को प्रहार पोस्ट बाहिरियो । ८९औं मिनेटमा बीबीसीका रोशन रानामगरले गोल गर्दै खेललाई ३–१ को अवस्थामा ल्याए । पहिलो खेलमा प्रभु बैंक जावलाखेल सँग गोलरहित बराबरीमा रोकिएको थ्र्रीस्टारले त्यसपछि नेपाल पुलिस क्लब र एपिएफालई समान १–० ले हराएको थियो ।

बिबिसीले भने अघिल्ला ४ मध्ये २ खेलमा जित निकालेको थियो । हिमालयन शेर्पालाई १–० ले हराएको बिबिसीले फ्रेन्ड्सलाई २–० ले पराजित गरेको थियो । बिबिसी मछिन्द्रसँग २–० र मनाङसँग १–० ले पराजित भएको थियो ।